ദുബായ്: യുഎഇയിലെ ജനസംഖ്യയിൽ കാര്യമായ വർധന രേഖപ്പെടുത്തി. ഏറ്റവും പുതിയ കണക്കുകൾ പ്രകാരം രാജ്യത്തെ ജനസംഖ്യ 5.7 ശതമാനം ഉയർന്ന് 1.12 കോടിയിലെത്തി. ഇതിൽ മുക്കാൽ പങ്കും പ്രവാസികളാണ്. കഴിഞ്ഞ വർഷം മാത്രം 6.15 ലക്ഷം ആളുകളാണ് പുതുതായി രാജ്യത്തെത്തിയത്.
ജനസംഖ്യ ഘടന
യുഎഇയിലെ ജനസംഖ്യയിൽ 64 ശതമാനവും പുരുഷന്മാരാണ്, ഏകദേശം 70.23 ലക്ഷം പേർ. സ്ത്രീകളുടെ എണ്ണം 40.59 ലക്ഷമാണ്. മുൻ വർഷത്തെ അപേക്ഷിച്ച് പുരുഷന്മാരുടെ എണ്ണത്തിൽ 5.7 ശതമാനം വർധനയുണ്ടായപ്പോൾ സ്ത്രീകളുടെ എണ്ണം 5.8 ശതമാനം ഉയർന്നു.
അബുദാബിയിലും ദുബായിലും വളർച്ച
തലസ്ഥാന എമിറേറ്റായ അബുദാബിയിൽ സ്ഥിര താമസക്കാരുടെ എണ്ണം കഴിഞ്ഞ വർഷം 7.5 ശതമാനം വർധിച്ചു. 2023-ൽ 38 ലക്ഷമായിരുന്നത് കഴിഞ്ഞ വർഷം 41.4 ലക്ഷമായി ഉയർന്നു.
അതേസമയം, ദുബായിലെ ജനസംഖ്യ ആദ്യമായി 40 ലക്ഷം കടന്നു. നിലവിൽ 40,06,656 പേരാണ് ദുബായിലുള്ളത്. കഴിഞ്ഞ 25 വർഷത്തിനിടെ 317 ശതമാനത്തിന്റെ വളർച്ചയാണ് ദുബായിലെ ജനസംഖ്യയിലുണ്ടായത്. ദുബായ് 2040 നഗരാസൂത്രണ പദ്ധതിയുടെ ഭാഗമായി, 2040-ഓടെ ദുബായ് ജനസംഖ്യ 58 ലക്ഷമായി ഉയരുമെന്നാണ് പ്രതീക്ഷിക്കുന്നത്. ഈ വളർച്ച രാജ്യത്തിന്റെ സാമ്പത്തിക, സാമൂഹിക മേഖലകളിലെ മുന്നേറ്റത്തിന്റെ സൂചനയായി വിലയിരുത്തപ്പെടുന്നു.
