ദുബായ്: ദുബായിൽ നിന്ന് കർണാടകയിലെ മംഗളൂരുവിലേക്ക് പുറപ്പെട്ട എയർ ഇന്ത്യ എക്സ്പ്രസ് (IX 814) വിമാനം മോശം കാലാവസ്ഥ കാരണം ബെംഗളൂരുവിൽ കുടുങ്ങി. യാത്രക്കാർ വിമാനത്തിനുള്ളിൽ ഏകദേശം 12 മണിക്കൂറോളം ദുരിതത്തിലായി. സ്ത്രീകളും കുട്ടികളും ഉൾപ്പെടെ നൂറിലധികം യാത്രക്കാരാണ് അനിശ്ചിതത്വത്തിലായത്.
ഇന്നലെ രാത്രി 11.40ന് ദുബായ് രാജ്യാന്തര വിമാനത്താവളത്തിൽ നിന്ന് മംഗളൂരുവിലേക്ക് നേരിട്ട് പറക്കേണ്ടിയിരുന്ന വിമാനം ഒരു മണിക്കൂറിലധികം വൈകിയാണ് പുറപ്പെട്ടത്.
രാവിലെ ആറോടെ മംഗളൂരു വിമാനത്താവളത്തിലിറങ്ങേണ്ട വിമാനം, അവിടെ ശക്തമായ മഴയും മൂടൽമഞ്ഞും കാരണം ലാൻഡ് ചെയ്യാൻ സാധിക്കാതെ വന്നു. മംഗളൂരുവിൽ ഒന്നിലേറെ തവണ വട്ടമിട്ടു പറന്നെങ്കിലും കാലാവസ്ഥ അനുകൂലമാവാത്തതിനെ തുടർന്ന് വിമാനം വഴിതിരിച്ച് വിട്ട് രാവിലെ ഏഴോടെ ബെംഗളൂരുവിലെ കെംപഗൗഡ അന്താരാഷ്ട്ര വിമാനത്താവളത്തിൽ (Kempegowda International Airport) ലാൻഡ് ചെയ്യുകയായിരുന്നു.
വിമാനം ബെംഗളൂരുവിൽ എത്തിയതിന് പിന്നാലെ, ഡ്യൂട്ടി സമയം (Flight Duty Time Limit – FDTL) അവസാനിച്ചു എന്ന കാരണത്താൽ പൈലറ്റുമാർ വിമാനത്തിൽ നിന്നിറങ്ങിപ്പോയി. ഇതോടെ യാത്രക്കാർ വിമാനത്തിനുള്ളിൽ കുടുങ്ങി. യാത്രക്കാരോട് വിമാനത്താവളത്തിൽ കാത്തിരിക്കാൻ അധികൃതർ ആവശ്യപ്പെട്ടെങ്കിലും, ലഗേജ് ശേഖരിക്കാനോ വയോധികർക്കും കുട്ടികൾക്കുമുള്ള സൗകര്യങ്ങൾ ലഭിക്കാനോ ബുദ്ധിമുട്ടുണ്ടാകുമെന്നതിനാൽ യാത്രക്കാർ വിമാനത്തിൽ നിന്ന് പുറത്തിറങ്ങാൻ വിസമ്മതിച്ചു.
യാത്രക്കാരുടെ കനത്ത പ്രതിഷേധം ശക്തമായതോടെ, വിമാനത്താവള അധികൃതരും എയർ ഇന്ത്യ എക്സ്പ്രസ് അധികൃതരും ചർച്ച നടത്തുകയും അവർക്ക് ഭക്ഷണം ഉൾപ്പെടെയുള്ള സൗകര്യങ്ങൾ വിമാനത്തിനുള്ളിൽ തന്നെ ലഭ്യമാക്കുകയും ചെയ്തു. ഏകദേശം 12 മണിക്കൂറോളം നീണ്ട അനിശ്ചിതത്വത്തിനൊടുവിൽ, പകൽ ഒരു മണിയോടെ പുതിയ ക്രൂവിനെ ഏർപ്പാടാക്കുകയും, യാത്രക്കാരെ മംഗളൂരുവിലേക്ക് എത്തിക്കാൻ മറ്റൊരു വിമാനം ഒരുക്കാനുള്ള നടപടികൾ സ്വീകരിക്കുകയും ചെയ്തു.
