അബുദാബി, ഷാർജ, അജ്മാൻ, ഫുജൈറ എന്നിവിടങ്ങളിലേക്ക് ദുബായിൽനിന്ന് പോകുന്ന മുഴുവൻ ഇന്റർസിറ്റി ബസിലും സൗജന്യ വൈഫൈ സൗകര്യം ഏർപ്പെടുത്തി. 259 ബസുകളിലാണ് ടെലികമ്യൂണിക്കേഷൻ സേവനദാതാവായ ഇത്തിസലാത്തുമായിചേർന്ന് റോഡ്സ് ആൻഡ് ട്രാൻസ്പോർട്ട് അതോറിറ്റി ഈ സൗകര്യം ഏർപ്പെടുത്തിയത്. സ്മാർട്ട്ഫോണുകൾ, ടാബ്ലെറ്റുകൾ, ലാപ്ടോപ്പുകൾ എന്നിവയിലൂടെ യാത്രയിലുടനീളം വൈഫൈ ലഭ്യമാകും. ബിസിനസ് ആവശ്യങ്ങൾക്കും മറ്റുമായി പോകുന്നവർക്ക് ബസ് യാത്രക്കിടയിൽ ജോലികൾ പൂർത്തീകരിക്കാൻ പുതിയ സംവിധാനം സഹായകരമാവും. തങ്ങളുടെ സേവനങ്ങളിലുടനീളം ഡിജിറ്റൽവത്കരണം നടപ്പിലാക്കുകയെന്ന ശ്രമങ്ങളുടെ ഭാഗമാണ് പുതിയ സംരംഭമെന്ന് ആർ.ടി.എ വ്യക്തമാക്കി. സമൂഹത്തിലെ എല്ലാ മേഖലയിലുമുള്ളവരുടെയും ആവശ്യങ്ങൾ നിറവേറ്റപ്പെടുന്നുണ്ടെന്ന് ഉറപ്പുവരുത്തുകയാണ് ലക്ഷ്യം.
