ഈ വര്‍ഷം വിശുദ്ധ ഹജ്ജ് നിര്‍വഹിക്കാന്‍ ആഗ്രഹിക്കുന്നവര്‍ക്കുള്ള റജിസ്‌ട്രേഷന്‍ നവംബർ 4 ന് ആരംഭിക്കുമെന്ന് ഒമാന്‍ മതകാര്യ മന്ത്രാലയം വ്യക്തമാക്കി. നവംബര്‍ 17 വരെ റജിസ്റ്റര്‍ ചെയ്യാം. പൗരന്മാര്‍ക്കും താമസക്കാര്‍ക്കും (www.hajj.om) എന്ന വെബ്‌സൈറ്റ് വഴി റജിസ്റ്റര്‍ ചെയ്യാനാകും. കാഴ്ച വൈകല്യമോ ശാരീരിക വൈകല്യമോ ഉള്ള സ്ത്രീകള്‍ക്കും പുരുഷന്മാര്‍ക്കും കൂടെ ആളുകളെ അനുവദിക്കുമെന്ന് മന്ത്രാലയം കൂട്ടിചെർത്തു. ഇലക്ട്രോണിക് സംവിധാനത്തില്‍ മുൻപ് റജിസ്റ്റര്‍ ചെയ്തവരില്‍നിന്നാകും അവരെ തിരഞ്ഞെടുക്കുന്നത്. അന്വേഷണങ്ങള്‍ക്കും മറ്റു വിവരങ്ങള്‍ക്കും ഔദ്യോഗിക സമയത്ത് 80008008 എന്ന മന്ത്രാലയത്തിന്റെ ഹോട്ട്‌ലൈന്‍ നമ്പറിൽ വിളിക്കാം. www.hajj.om എന്ന വെബ്‌സൈറ്റ് വഴിയും അന്വേഷണങ്ങളും മറ്റും ഫയല്‍ ചെയ്യാവുന്നതാണ്. റജിസ്റ്റര്‍ ചെയ്യുന്നവരില്‍ നിന്ന് ഹജ്ജിന് അവസരം ലഭിക്കുന്നവരെ മന്ത്രാലയം വിവരം അറിയിക്കുകയും തുടര്‍ നടപടികള്‍ക്ക് നിർദേശം നൽകുക്കയും ചെയ്യും.
