ഒമാൻ ലോയേഴ്സ് അസോസിയേഷന്റെ ഫാക് കുർബ പദ്ധതിയിലൂടെ പ്രവാസികളുൾപ്പെടെ 488 തടവുകാർക്ക് മോചനം ലഭിച്ചതായി റിപ്പോർട്ട്. ഈ വർഷം ഇതുവരെ 999 തടവുകാർക്കാണ് മോചനം സാധ്യമായത്. ഗുരുതരമല്ലാത്ത ചെറിയ കുറ്റങ്ങൾക്ക് ശിക്ഷിക്കപ്പെട്ടവർക്കാണ് ഈ മോചനം ലഭിച്ചത്. കഴിഞ്ഞ രണ്ടാഴ്ചയ്ക്കിടെ മോചനം നേടിയവരില്‍ 202 പേരും മസ്‌കത്തിലെ ജയിലുകളിൽ കഴിഞ്ഞിരുന്നവരാണ്.
ചെറിയ കുറ്റങ്ങള്‍ക്ക് പിഴത്തുക അടയ്ക്കാന്‍ കഴിയാത്തതിനെ തുടര്‍ന്ന് ജയിൽ ശിക്ഷക്ക് വിധിക്കപ്പെട്ടവരെ മോചിതരാക്കാന്‍ സഹായിക്കുന്ന പദ്ധതിയാണ് ഫാക് കുര്‍ബ. ഈ പദ്ധതിയിലൂടെ ആയിരക്കണക്കിന് പേരെയാണ് കഴിഞ്ഞ കാലങ്ങളില്‍ ഉറ്റവരുടെ സ്‌നേഹ തണലിലേക്ക് മടക്കിയെത്തിക്കാന്‍ കഴിഞ്ഞത്. 1,300 തടവുകാര്‍ക്ക് ഈ വര്‍ഷം മോചനം സാധ്യമാക്കാൻ കഴിയും എന്നാണ് ഒമാന്‍ ലോയേഴ്സ് അസോസിയേഷന്റെ പ്രതീക്ഷ. പൊതുജനങ്ങളില്‍ നിന്ന് പണം സ്വരൂപിച്ചാണ് ജയിലില്‍ കഴിയുന്നവരെ മോചിപ്പിക്കുന്നത്.
