യുഎഇയില്‍ ഒക്ടോബര്‍ ഒന്ന് മുതല്‍ ചില പ്രധാനപ്പെട്ട മാറ്റങ്ങള്‍ വരാനിരിക്കുകയാണ്. അടുത്ത മാസം മുതല്‍ പ്രാബല്യത്തില്‍ വരുന്ന മാറ്റങ്ങളും പ്രധാന പ്രഖ്യാപനങ്ങളും ഇവയാണ്. അജ്മാന്‍ പൊലീസ് മൊബൈല്‍ ഉപയോഗവും സീറ്റ് ബെല്‍റ്റ് ലംഘനവും കണ്ടുപിടിക്കാന്‍ എഐ സാങ്കേതിക വിദ്യ ഉപയോഗിച്ചുള്ള പുതിയ ട്രാഫിക് നിരീക്ഷണ സംവിധാനം നടപ്പിലാക്കും. ശ്രീലങ്കയില്‍ യുഎഇ ഉള്‍പ്പെടെ 35 രാജ്യങ്ങളിലെ പൗരന്മാര്‍ക്ക് വിസയില്ലാതെ പ്രവേശന സൗകര്യം ഒക്ടോബര്‍ ഒന്ന് മുതല്‍ നടപ്പിലാക്കുന്നു. ദുബൈയിലെ വെര്‍ച്വല്‍ ആസറ്റ് റഗുലേറ്ററി അതോറിറ്റി പുതിയ മാര്‍ക്കറ്റിംഗ് മാര്‍ഗനിര്‍ദേശങ്ങള്‍ അവതരിപ്പിക്കുന്നു. ഉപഭോക്തൃ സംരക്ഷണത്തിനും സുതാര്യതക്കും പ്രാധാന്യം നല്‍കുന്നു. ‘പിങ്ക് കരവാന്‍’ പദ്ധതി വഴി ലോകത്തെ ‘ബ്രെസ്റ്റ് ക്യാന്‍സര്‍ പ്രതിരോധ മാസം’ ആചരിക്കുന്നതിന്റെ ഭാഗമായി സൗജന്യ സ്‌ക്രീനിംഗും ബോധവല്‍ക്കരണ പരിപാടികളും രാജ്യവ്യാപകമായി സംഘടിപ്പിക്കും. പുതിയ നവീകരണങ്ങളോടുകൂടി ദുബൈ സഫാരി പാര്‍ക്ക് ഒക്ടോബര്‍ 1-ന് വീണ്ടും സന്ദര്‍ശകരെ സ്വാഗതം ചെയ്യും, 3,000 മൃഗങ്ങള്‍ ഉള്‍പ്പെടെ വിവിധ വംശനാശ ഭീഷണി നേരിടുന്ന ജന്തുക്കളെ പ്രദര്‍ശിപ്പിക്കുന്നതിനായി പാര്‍ക്കില്‍ എത്തിച്ചിട്ടുണ്ട്. ഒക്ടോബര്‍ 1 മുതല്‍ അബുദാബിയില്‍ വിവാഹിതരാകുന്ന യുഎഇ സ്വദേശികള്‍ വിവാഹത്തിന് മുമ്പ് ജനിതക പരിശോധന നടത്തേണ്ടത് നിര്‍ബന്ധമാക്കി.
