അബുദാബി: യു എ ഇയിൽ വൈദ്യുതവാഹനങ്ങളുടെ ലൈസൻസിങ് നടപടികൾ പൂർത്തിയാക്കാനുള്ള പരിശോധനയ്ക്കായി അബുദാബിയിൽ രണ്ടു പുതിയപാതകൾ തുറന്നു. വൈദ്യുതവാഹനത്തിന്റെ സാങ്കേതികപരിശോധനകൾക്കും, ലൈസൻസിങ്ങിനും, രജിസ്‌ട്രേഷനുള്ള സേവനങ്ങൾക്കും പുതിയ പാതകൾ പ്രയോജനപ്പെടുത്താവുന്നതാണ്. വൈദ്യുത വാഹനങ്ങളുടെ ജനപ്രീതി വർധിക്കുന്നപശ്ചാത്തലത്തിൽ ഉപഭോക്താക്കൾക്ക് തടസ്സമില്ലാത്ത സേവനംനൽകുകയാണ് ലക്ഷ്യം. അഡ്‌നോക് വിതരണ കമ്പനിയുടെയും പോലീസിന്റെയും സഹകരണത്തിൽ മുറൂർ, അൽ ബത്തീൻ എന്നിവിടങ്ങളിലെ അഡ്‌നോക് വാഹന പരിശോധനാകേന്ദ്രത്തിലാണ് പാതകൾ തുറന്നത്. സർക്കാരിന്റെ നിർദേശങ്ങൾക്കനുസൃതമായി സേവനങ്ങൾ മെച്ചപ്പെടുത്തിക്കൊണ്ട് ഉയർന്ന ഉപഭോക്തൃ സംതൃപ്തി കൈവരിക്കുകയാണ് ലക്ഷ്യമെന്ന് ഡ്രൈവേഴ്‌സ് ആൻഡ് വെഹിക്കിൾസ് ലൈസൻസിങ് ഡയറക്ടറേറ്റ് ഡയറക്ടർ പറഞ്ഞു.
