ഖത്തറില്‍ കോവിഡ് വാക്‌സിൻ രണ്ട് ഡോസും സ്വീകരിച്ച് 6 മാസം പിന്നിട്ടവർക്കും ബൂസ്റ്റർ ഡോസിന് അനുമതി നൽകി ആരോഗ്യമന്ത്രാലയം. രണ്ടാം ഡോസെടുത്ത് എട്ട് മാസം പിന്നിട്ടവർക്ക് മാത്രമാണ് നേരത്തെ ബൂസ്റ്റർ ഡോസ് നൽകിയിരുന്നത്. ഈ യോഗ്യതാ കാലപരിധി കുറച്ചു രണ്ടാം ഡോസ് സ്വീകരിച്ച് ആറ് മാസം കഴിഞ്ഞവര്‍ക്കും ഇനി ബൂസ്റ്റര്‍ ഡോസ് സ്വീകരിക്കാം എന്നാണ് ആരോഗ്യമന്ത്രാലയത്തിന്റെ പുതിയ നിർദേശം.
പിഎച്ച്സിസി വഴിയാണ് ബൂസ്റ്റര്‍ ഡോസിനുള്ള അപ്പോയിന്‍മെന്‍റ് നല്‍കുന്നത്. അപ്പോയിന്‍മെന്‍റ് ലഭിക്കാത്തവര്‍ക്ക് പിഎച്ച്സിസിയുടെ ഹോട്ട്ലൈന്‍ നമ്പറായ 40277077 നമ്പറില്‍ വിളിച്ച് അപ്പോയിന്‍മെന്‍റിനായി ശ്രമിക്കാവുന്നതാണെന്നും മന്ത്രാലയം അറിയിച്ചു.
കഴിഞ്ഞ രണ്ടാഴ്ചകളിലായി പുതിയ രോഗബാധിതരുടെ എണ്ണം ചെറിയ തോതില്‍ ഉയരുന്നുണ്ട്. കൂടാതെ നേരത്തെ വാക്സിന്‍ സ്വീകരിച്ചവര്‍ക്കും രോഗം പിടിപെടുന്നുണ്ട്. കോവിഡ് വാക്‌സിൻ രണ്ട് ഡോസും സ്വീകരിച്ചതിലൂടെ ലഭിക്കുന്ന പ്രതിരോധ ശേഷി ആറ് മാസം പിന്നിടുമ്പോള്‍ ക്രമേണ കുറഞ്ഞുവരുന്നുവെന്ന കണ്ടെത്തലുകളുടെ അടിസ്ഥാനത്തെത്തുടർന്നാണ് പുതിയ നടപടിയെന്ന് മന്ത്രാലയം വ്യക്തമാക്കി. വിദേശയാത്ര ചെയ്യാൻ ഉദ്ദേശിക്കുന്നവര്‍ യാത്രക്ക് മുമ്പായി ബൂസ്റ്റര്‍ ഡോസ് സ്വീകരിക്കേണ്ടത് അനിവാര്യമാണെന്നും ആരോഗ്യമന്ത്രാലയം നിർദേശം നൽകി.
