കുവൈത്ത് സിറ്റി: ജീർണാവസ്ഥയിലുള്ള 67 കെട്ടിടങ്ങൾ ഉടൻ ഒഴിയണമെന്ന് ഉടമകൾക്ക് നിർദേശം നൽകി കുവൈത്ത് മുനിസിപ്പാലിറ്റി. കുവൈത്തിലെ ജ്ലീബ് അൽ-ഷുയൂഖ് പ്രദേശത്തെ കെട്ടിടങ്ങൾക്കാണ് മുനിസിപ്പൽ പരിശോധനയെത്തുടർന്ന് ഈ നിർദേശം നൽകിയിട്ടുള്ളത്.
കുവൈത്ത് മുനിസിപ്പാലിറ്റി ഡയറക്ടർ ജനറൽ എൻജിനീയർ മനൽ അൽ അസ്ഫൂർ ആണ് നടപടി അറിയിച്ചത്. കെട്ടിടങ്ങൾ പൊതുസുരക്ഷയ്ക്ക് ഭീഷണിയാണെന്ന് കണ്ടെത്തിയതിനെ തുടർന്നാണ് ഈ കർശനമായ തീരുമാനം.
പൊതു സുരക്ഷയ്ക്ക് ഭീഷണി
കെട്ടിടങ്ങൾ സുരക്ഷിതമല്ലാത്ത അവസ്ഥയിലാണെന്ന് പൊതുമന്ത്രാലയത്തിന് കീഴിലുള്ള ഗവൺമെന്റ് സെന്റർ ഫോർ ടെസ്റ്റിങ്, ക്വാളിറ്റി കൺട്രോൾ, റിസർച്ച് എന്നിവിടങ്ങളിൽ നിന്നുള്ള റിപ്പോർട്ടുകൾ സ്ഥിരീകരിക്കുന്നു. നഗരത്തിലെ ജനങ്ങളുടെ ജീവനും സ്വത്തും പൊതു സുരക്ഷയും സംരക്ഷിക്കുന്നതിന് ഈ കെട്ടിടങ്ങൾ പൊളിച്ചുമാറ്റേണ്ടത് അനിവാര്യമാണെന്ന് മുനിസിപ്പാലിറ്റി വിലയിരുത്തി.
പ്രസിദ്ധീകരണം: ഈ തീരുമാനം ഞായറാഴ്ച ഔദ്യോഗിക ഗസറ്റായ ‘കുവൈത്ത് അൽയൗമിൽ’ പ്രസിദ്ധീകരിച്ചിട്ടുണ്ട്.
ഉടമകൾക്ക് രണ്ടാഴ്ചത്തെ സമയം
ഔദ്യോഗിക ഗസറ്റിൽ തീരുമാനം പ്രസിദ്ധീകരിച്ച തീയതി മുതൽ രണ്ടാഴ്ചയ്ക്കകം വസ്തു ഉടമകൾ കെട്ടിടങ്ങൾ പൂർണ്ണമായി ഒഴിപ്പിക്കുകയും കെട്ടിടം പൊളിച്ചുമാറ്റുന്നതിന് ആവശ്യമായ നടപടികൾ സ്വീകരിക്കുകയും വേണം.
നിർദേശങ്ങൾ പാലിക്കപ്പെടുന്നുണ്ടോ എന്ന് മുനിസിപ്പാലിറ്റിയുടെ ബന്ധപ്പെട്ട വകുപ്പ് ഈ സമയപരിധിക്കുള്ളിൽ സൂക്ഷ്മമായി നിരീക്ഷിക്കും.
കർശന മുന്നറിയിപ്പ്: നിശ്ചിത സമയപരിധിക്കുള്ളിൽ ഉടമകൾ ആവശ്യമായ നടപടികൾ സ്വീകരിക്കുന്നതിൽ പരാജയപ്പെട്ടാൽ, കെട്ടിടം പൊളിച്ചുമാറ്റുന്നതിനുള്ള നടപടികളുമായി മുനിസിപ്പാലിറ്റി നേരിട്ട് മുന്നോട്ട് പോകും.
