ഏതെങ്കിലും വഞ്ചനാപരമായ കോളുകളോ ടെക്സ്റ്റ് സന്ദേശങ്ങളോ വന്നാൽ കുവൈത്തിലെ ഏകീകൃത ആപ്ലിക്കേഷനായ സഹേൽ ആപ്പ് വഴി റിപ്പോർട്ട് ചെയ്യാൻ കമ്മ്യൂണിക്കേഷൻസ് ആൻഡ് ഇൻഫർമേഷൻ ടെക്നോളജി റെഗുലേറ്ററി അതോറിറ്റി. കുവൈറ്റിലെ എല്ലാ പൗരന്മാരോടും പ്രവാസികളോടും അഭ്യർത്ഥിച്ചു. സൈബർ സുരക്ഷ വർദ്ധിപ്പിക്കുന്നതിനും ഉപയോക്താക്കളുടെ സ്വകാര്യ ഡാറ്റ ഡിജിറ്റൽ തട്ടിപ്പിൽ നിന്ന് സംരക്ഷിക്കുന്നതിനുമുള്ള സിട്രയുടെ തുടർച്ചയായ ശ്രമങ്ങളുടെ ഭാഗമാണിത്. ഇത്തരം തട്ടിപ്പുകൾ റിപ്പോർട്ട് ചെയ്യുന്നത് അവയുടെ ഉറവിടങ്ങൾ കണ്ടെത്താൻ സഹായിക്കുമെന്നും ഉത്തരവാദിത്തപ്പെട്ടവർക്കെതിരെ നിയമനടപടി സ്വീകരിക്കാൻ അധികാരികളെ അനുവദിക്കുമെന്നും സിട്ര ഒരു ഔദ്യോഗിക പ്രസ്താവനയിൽ വ്യക്തമാക്കി. സംശയാസ്പദമായ സന്ദേശങ്ങളോട് പ്രതികരിക്കുകയോ അജ്ഞാത ലിങ്കുകളിൽ ക്ലിക്ക് ചെയ്യുകയോ ചെയ്യരുതെന്നും അതോറിറ്റി പൊതുജനങ്ങൾക്ക് മുന്നറിയിപ്പ് നൽകി. രാജ്യത്ത് സുരക്ഷിതമായ ഡിജിറ്റൽ അന്തരീക്ഷം നിലനിർത്തുന്നതിന് ആപ്പ് വഴി ഉടൻ റിപ്പോർട്ട് ചെയ്യണമെന്നും അതോറിറ്റി നിർദ്ദേശിച്ചു.
