അഗ്‌നിബാധയുണ്ടായാല്‍ സ്വയം തീ കെടുത്താവുന്ന സംവിധാനം സ്‌കൂള്‍ ബസുകളില്‍ നിര്‍ബന്ധമാക്കി യുഎഇ. 5 ലക്ഷം കുട്ടികളെ രക്ഷിക്കാവുന്ന സംരംഭം എല്ലാ സ്‌കൂള്‍ ബസുകളിലും നിര്‍ബന്ധമാക്കി വ്യവസായ, നൂതന സാങ്കേതിക മന്ത്രാലയം ഉത്തരവിറക്കിയത്. ഡ്രൈവര്‍ ഉള്‍പ്പെടെ 22ല്‍ കൂടുതല്‍ ആളുകള്‍ക്ക് യാത്ര ചെയ്യാന്‍ ശേഷിയുള്ള സിംഗിള്‍, ഡബിള്‍ ഡെക്കര്‍, ആര്‍ട്ടിക്കുലേറ്റഡ് വാഹനങ്ങളെല്ലാം പുതിയ നിയമത്തിന്റെ പരിധിയില്‍ വരുന്നതാണ്. ഈ സംവിധാനം സജ്ജമാക്കാത്ത സ്‌കൂള്‍ ബസുകള്‍ക്ക് പെര്‍മിറ്റ് നല്‍കുകയോ പുതുക്കുകയോ ചെയ്യില്ലെന്ന് എമിറേറ്റ്‌സ് റോഡ് ട്രാന്‍സ്‌പോര്‍ട്ട് അതോറിറ്റികളും സ്ഥിരീകരിച്ചു. ആദ്യഘട്ടത്തില്‍ സ്‌കൂള്‍ ബസുകളിലാണ് നിര്‍ബന്ധമാക്കുന്നത്. തുടര്‍ന്ന് രണ്ടാം ഘട്ടത്തില്‍ യാത്രാ ബസ്സുകളിലേക്കും വ്യാപിപ്പിക്കുന്നതാണ്. വിദ്യാര്‍ഥികളുടെയും യാത്രക്കാരുടെയും സുരക്ഷ ഉറപ്പുവരുത്തുന്നതിന്റെ ഭാഗമായാണ് ഈ പുതിയ നടപടി. 12 മാസത്തിനകം യുഎഇയിലെ 17,000 സ്‌കൂള്‍ ബസുകളില്‍ സംവിധാനം സ്ഥാപിക്കാനാണ് മന്ത്രാലയത്തിന്റെ നീക്കം.
