ദുബൈയിൽ സ്വർണ്ണവിലയിൽ വൻ വർദ്ധനവ്. വെള്ളിയാഴ്ച വൈകുന്നേരത്തെ കണക്കുകൾ പ്രകാരം 22 കാരറ്റ് സ്വർണ്ണത്തിന്റെ വില ഗ്രാമിന് 500 ദിർഹം എന്ന ചരിത്രപരമായ നാഴികക്കല്ല് പിന്നിട്ടു. ദുബൈ ജ്വല്ലറി ഗ്രൂപ്പിന്റെ കണക്കനുസരിച്ച് 24 കാരറ്റ് സ്വര്ണം ഗ്രാമിന് 540.25 ദിർഹമാണ് നിലവിലെ വില. 22 കാരറ്റ് സ്വര്ണത്തിന് 500.25 ദിർഹം , 21 കാരറ്റ് സ്വര്ണത്തിന് 479.75 ദിർഹം , 18 കാരറ്റ് സ്വര്ണത്തിന് 411.25 ദിർഹം എന്നിങ്ങനെയാണ് നിലവിലെ നിരക്ക്. ആഗോള വിപണിയിൽ സ്വർണ്ണവില ഔൺസിന് 4,500 ഡോളർ എന്ന നിരക്ക് മറികടന്നു. ഇതിന് പ്രധാനമായും മൂന്ന് കാരണങ്ങളാണുള്ളത്. അമേരിക്കയിലെ തൊഴിൽ വിപണിയിലെ തളർച്ചയും വെനിസ്വേലയുമായുള്ള രാഷ്ട്രീയ അസ്വസ്ഥതകളും സ്വർണവില ഉയരാൻ പ്രധാന കാരണങ്ങളായി സാമ്പത്തിക വിദഗ്ധർ ചൂണ്ടിക്കാട്ടുന്നു. അമേരിക്കൻ ഫെഡറൽ റിസർവ് ചെയർമാന്റെ മാറ്റവും വരാനിരിക്കുന്ന പുതിയ നേതൃത്വം പലിശ നിരക്ക് കുറച്ചേക്കുമെന്ന സൂചനകളും വില വർദ്ധനവിന് കാരണമായി. സ്വർണ്ണം വരും ദിവസങ്ങളിലും കരുത്ത് കാട്ടുന്നത് തുടരുമെന്നാണ് വിദഗ്ധർ പറയുന്നത്.
