ദുബായ്: വിമാന യാത്രയ്ക്കിടയിലും ഇനി തടസ്സങ്ങളില്ലാതെ ഇന്റർനെറ്റ് ഉപയോഗിക്കാം. തങ്ങളുടെ യാത്രക്കാർക്ക് ഇലോൺ മസ്കിന്റെ ഉടമസ്ഥതയിലുള്ള ‘സ്റ്റാർലിങ്ക്’ (Starlink) വഴി അതിവേഗ സൗജന്യ വൈഫൈ സേവനം ലഭ്യമാക്കുമെന്ന് എമിറേറ്റ്സ് എയർലൈൻസ് പ്രഖ്യാപിച്ചു.
വിമാനത്തിനുള്ളിലെ കണക്റ്റിവിറ്റിയിൽ വലിയൊരു വിപ്ലവത്തിനാണ് എമിറേറ്റ്സ് തുടക്കം കുറിക്കുന്നത്. നിലവിലെ ഇൻ-ഫ്ലൈറ്റ് വൈഫൈ സംവിധാനങ്ങളെക്കാൾ പതിന്മടങ്ങ് വേഗതയും കൃത്യതയും സ്റ്റാർലിങ്ക് ഉറപ്പുനൽകുന്നു. ഇതോടെ യാത്രക്കാർക്ക് ആകാശത്തുവെച്ചും തടസ്സങ്ങളില്ലാതെ വീഡിയോ കോളുകൾ ചെയ്യാനും, സിനിമകൾ സ്ട്രീം ചെയ്യാനും, ഓൺലൈൻ ഗെയിമുകൾ കളിക്കാനും സാധിക്കും. വീട്ടിലിരുന്ന് ഇന്റർനെറ്റ് ഉപയോഗിക്കുന്ന അതേ വേഗത വിമാനത്തിനുള്ളിലും ലഭിക്കുമെന്നതാണ് ഇതിന്റെ പ്രത്യേകത.
എമിറേറ്റ്സിന്റെ പുതിയ എയർബസ് A350 വിമാനങ്ങളിലായിരിക്കും ഈ സേവനം ആദ്യം ലഭ്യമാവുകയെന്നാണ് റിപ്പോർട്ടുകൾ. എമിറേറ്റ്സ് സ്കൈവാർഡ്സ് (Emirates Skywards) അംഗങ്ങൾക്ക് ഈ സേവനം സൗജന്യമായി ഉപയോഗിക്കാൻ സാധിക്കും.
ലോകമെമ്പാടും അതിവേഗ സാറ്റലൈറ്റ് ഇന്റർനെറ്റ് ശൃംഖല തീർത്ത സ്റ്റാർലിങ്കുമായി കൈകോർക്കുന്നതിലൂടെ യാത്രക്കാർക്ക് മികച്ച യാത്രാനുഭവം നൽകാനാണ് എമിറേറ്റ്സ് ലക്ഷ്യമിടുന്നത്.
