ദുബൈ: എയർ ഇന്ത്യ എക്സ്പ്രസ് വിന്റർ ഷെഡ്യൂളിന്റെ ഭാഗമായി ദുബൈ-തിരുവനന്തപുരം-ദുബൈ സെക്ടറിൽ വിമാന സർവീസുകൾ പുനഃരാരംഭിച്ചു. ഇത് തിരുവനന്തപുരം യാത്രക്കാർക്ക് വലിയ ആശ്വാസമാകും. ഇതിന് പുറമെ, അബുദാബി-തിരുവനന്തപുരം-അബുദാബി സെക്ടറിലും എയർ ഇന്ത്യ എക്സ്പ്രസ് സർവീസുകൾ തുടങ്ങും. ഡിസംബർ മൂന്ന് മുതലാണ് ഈ റൂട്ടിൽ സർവീസുകൾ ആരംഭിക്കുക. ഈ റൂട്ടിൽ പ്രതിവാരം മൂന്ന് സർവീസുകൾ ഉണ്ടാകുമെങ്കിലും, സർവീസുകളുടെ ആഴ്ചയിലെ ഷെഡ്യൂൾ ഇതുവരെ ലഭ്യമായിട്ടില്ല. യാത്രക്കാർ ടിക്കറ്റ് ബുക്ക് ചെയ്യുന്നതിന് മുമ്പ് വിമാനങ്ങളുടെ സമയക്രമം സംബന്ധിച്ച വിവരങ്ങൾ എയർലൈനിന്റെ വെബ്സൈറ്റിലോ അംഗീകൃത ഏജന്റുമാർ വഴിയോ പരിശോധിച്ച് ഉറപ്പാക്കണമെന്ന് എയർ ഇന്ത്യ എക്സ്പ്രസ് വ്യക്തമാക്കി.
