ദുബായ്: യുഎഇയുടെ വീസാ നിയമങ്ങളിൽ സുപ്രധാനമായ ഭേദഗതികളും കൂട്ടിച്ചേർക്കലുകളും പ്രഖ്യാപിച്ചു. ഫെഡറൽ അതോറിറ്റി ഫോർ ഐഡന്റിറ്റി, സിറ്റിസൺഷിപ്പ്, കസ്റ്റംസ് ആൻഡ് പോർട്ട് സെക്യൂരിറ്റി (ICP) ആണ് പുതിയ നിയമങ്ങൾ പുറത്തിറക്കിയത്. പുതുതായി നാല് സന്ദർശക വീസാ വിഭാഗങ്ങൾ ഉൾപ്പെടുത്തിയതാണ് ഏറ്റവും പ്രധാനപ്പെട്ട മാറ്റം.
നിർമിതബുദ്ധി (AI), വിനോദം, ഇവന്റുകൾ, ക്രൂയിസ് കപ്പലുകൾ, ഒഴിവുസമയ ബോട്ടുകൾ തുടങ്ങിയ മേഖലകളിലെ വിദഗ്ധരെ ലക്ഷ്യമിട്ടാണ് ഈ പുതിയ സന്ദർശക വീസകൾ അവതരിപ്പിച്ചത്. യുഎഇയുടെ വളരുന്ന സമ്പദ്വ്യവസ്ഥയ്ക്ക് അനുസൃതമായി പ്രത്യേക വൈദഗ്ധ്യമുള്ള പ്രവാസികളെ രാജ്യത്തേക്ക് ആകർഷിക്കാൻ ഈ നീക്കം സഹായകമാവുമെന്നാണ് വിലയിരുത്തൽ.
പ്രധാനപ്പെട്ട പുതിയ വീസാ വിഭാഗങ്ങളും ഭേദഗതികളും:
പുതിയ ഭേദഗതികൾ പ്രകാരം നിരവധി വിഭാഗക്കാർക്ക് യുഎഇയിൽ താമസാനുമതി നേടുന്നതിനും സന്ദർശനത്തിനും പുതിയ വഴികൾ തുറക്കും:
ഹ്യുമാനിറ്റേറിയൻ റെസിഡൻസ് പെർമിറ്റ്: പ്രത്യേക മാനദണ്ഡങ്ങൾക്ക് വിധേയമായി ഒരു വർഷത്തേയ്ക്ക് സാധുതയുള്ള ഈ റെസിഡൻസ് പെർമിറ്റ് അനുവദിക്കും. അതോറിറ്റിയുടെ തീരുമാനപ്രകാരം ഇത് നീട്ടാനുള്ള സാധ്യതയുമുണ്ട്.
വിധവകൾക്കും വിവാഹമോചിതർക്കും താമസാനുമതി: വിദേശ പൗരന്റെ വിധവയ്ക്കോ വിവാഹമോചിതയ്ക്കോ ഒരു വർഷത്തേക്ക് താമസാനുമതി ലഭിക്കും. നിശ്ചിത വ്യവസ്ഥകൾക്ക് വിധേയമായി സമാനമായ കാലയളവിലേക്ക് ഇത് പുതുക്കാൻ സാധിക്കും.
സുഹൃത്തുക്കൾക്കും ബന്ധുക്കൾക്കുമുള്ള സന്ദർശക വീസ: മൂന്നാം തലമുറയിലുള്ള സുഹൃത്തുക്കളെയോ ബന്ധുക്കളെയോ സ്പോൺസറുടെ വരുമാനത്തെ അടിസ്ഥാനമാക്കി യുഎഇയിലേക്ക് കൊണ്ടുവരാൻ സാധിക്കുന്ന വിസിറ്റ് വീസയാണിത്.
കമ്പനി ഉടമകൾക്കും വിദഗ്ധർക്കുമുള്ള വീസ: യുഎഇയിൽ ഒരു കമ്പനി സ്ഥാപിക്കുന്നതിന് സാമ്പത്തിക സ്ഥിരത തെളിയിക്കുന്നവർക്കോ, രാജ്യത്തിന് പുറത്തുള്ള നിലവിലെ കമ്പനിയിൽ ഓഹരി ഉടമസ്ഥതയുള്ളവർക്കോ, അല്ലെങ്കിൽ പ്രഫഷനൽ വൈദഗ്ധ്യം തെളിയിക്കുന്നവർക്കോ ഈ വീസ ലഭിക്കും.
ട്രക്ക് ഡ്രൈവർ വീസ: സ്പോൺസറുടെ സാന്നിധ്യം, ആരോഗ്യ സംരക്ഷണം, സാമ്പത്തിക ഗ്യാരണ്ടി എന്നിവ ഈ വീസയ്ക്ക് നിർബന്ധമാക്കിയിട്ടുണ്ട്.
ഓരോ വീസാ വിഭാഗത്തിന്റെയും താമസ കാലാവധിയും അത് നീട്ടുന്നതിനുള്ള വ്യവസ്ഥകളും വ്യക്തമാക്കുന്ന കൃത്യമായ ഷെഡ്യൂളുകൾ അതോറിറ്റി പുറത്തിറക്കിയിട്ടുണ്ട്.
