റിയാദ്: സൗദി അറേബ്യയിൽ വീട്ടുവാടക വർദ്ധിപ്പിക്കുന്നതിന് കർശന നിയന്ത്രണങ്ങൾ ഏർപ്പെടുത്തിക്കൊണ്ടുള്ള പരിഷ്കരിച്ച ഭവന നിർമ്മാണ പദ്ധതി പ്രാബല്യത്തിലായി. അഞ്ചു വർഷത്തേക്ക് വാടക വർദ്ധിപ്പിക്കുന്നത് വിലക്കിക്കൊണ്ടുള്ള ഈ പുതിയ നിയമം, അടിക്കടിയുള്ള വാടക വർദ്ധനവിൽ ബുദ്ധിമുട്ടിയിരുന്ന പ്രവാസി മലയാളികൾ ഉൾപ്പെടെയുള്ള വിദേശികൾക്ക് വലിയ ആശ്വാസമാണ് നൽകുന്നത്.
ശരാശരി 40 ശതമാനം വരെ വാടക വർദ്ധിപ്പിച്ചതിനെതിരെ വ്യാപക പരാതികൾ ഉയർന്ന സാഹചര്യത്തിലാണ് സൗദി മന്ത്രിസഭയുടെ ഈ നിർണ്ണായക തീരുമാനം. കിരീടാവകാശിയും പ്രധാനമന്ത്രിയുമായ മുഹമ്മദ് ബിൻ സൽമാന്റെ നിർദ്ദേശപ്രകാരമാണ് മന്ത്രിസഭ നിയമത്തിന് അംഗീകാരം നൽകിയത്.
പ്രധാന നിയമ മാറ്റങ്ങൾ:
- അഞ്ചു വർഷത്തേക്ക് വർദ്ധനവ് വിലക്കി: റിയാദ് നഗരപരിധിയിലുള്ള പുതിയതും നിലവിലുള്ളതുമായ കെട്ടിടങ്ങൾക്ക് അഞ്ചു വർഷത്തേക്ക് വാടക വർദ്ധിപ്പിക്കാൻ ഉടമകൾക്ക് സാധിക്കില്ല.
- മറ്റ് നഗരങ്ങളിലേക്ക് വ്യാപിപ്പിക്കും: കൗൺസിൽ ഓഫ് ഇക്കണോമിക് ആൻഡ് ഡെവലപ്മെന്റ് അഫയേഴ്സിന്റെ അനുമതിയോടെ, ആവശ്യമെങ്കിൽ ഈ നിയമം സൗദിയിലെ മറ്റ് നഗരങ്ങളിലേക്കും ഗവർണറേറ്റുകളിലേക്കും വ്യാപിപ്പിക്കാൻ റിയൽ എസ്റ്റേറ്റ് ജനറൽ അതോറിറ്റിക്ക് അനുമതി നൽകിയിട്ടുണ്ട്.
- ശരാശരി വാടക: ഒഴിഞ്ഞുകിടക്കുന്ന കെട്ടിടങ്ങളുടെ വാടക നിശ്ചയിക്കുമ്പോൾ, പ്രദേശത്തെ ശരാശരി വാടക നിരക്കിനെക്കാൾ കൂടാൻ പാടില്ല.
- ഇജാർ പ്ലാറ്റ്ഫോം നിർബന്ധം: എല്ലാ വാടക കരാറുകളും ഇജാർ (Ejar) പ്ലാറ്റ്ഫോമിൽ നിർബന്ധമായും രജിസ്റ്റർ ചെയ്യണം.
- കരാർ പുതുക്കൽ: കരാർ കാലാവധി അവസാനിക്കുന്നതിന് 60 ദിവസം മുൻപെങ്കിലും അറിയിച്ചില്ലെങ്കിൽ വാടക കരാർ സ്വമേധയാ പുതുക്കും. വാടകക്കാരൻ തുടരാൻ താൽപര്യം പ്രകടിപ്പിച്ചാൽ കെട്ടിട ഉടമ അത് നിരസിക്കാൻ പാടില്ല എന്നും നിബന്ധനയുണ്ട്.
അകാരണമായി കെട്ടിട ഉടമ വാടക കരാർ ലംഘിച്ചാൽ 12 മാസത്തെ വാടകയ്ക്ക് തുല്യമായ പിഴ ചുമത്തും. കൂടാതെ, വാടകക്കാരന് നഷ്ടപരിഹാരവും ലഭിക്കും. നിയമം ലംഘിച്ച് വാടക വർധിപ്പിക്കുന്നത് കണ്ടെത്താൻ നിരീക്ഷണം ശക്തമാക്കുമെന്നും കുറ്റക്കാർക്ക് കടുത്ത നടപടി നേരിടേണ്ടിവരുമെന്നും അധികൃതർ മുന്നറിയിപ്പ് നൽകി.
വാടക നൽകാതിരിക്കുക, സുരക്ഷാപ്രശ്നങ്ങളുണ്ടാക്കുക, മറ്റൊരാൾക്ക് താമസത്തിനു നൽകുക തുടങ്ങിയ സന്ദർഭങ്ങളിൽ കരാർ റദ്ദാക്കാൻ കെട്ടിട ഉടമയ്ക്ക് അധികാരമുണ്ട്. വാടക സംബന്ധിച്ച പരാതികൾ 60 ദിവസത്തിനകം സമർപ്പിക്കണമെന്നും അല്ലാത്തപക്ഷം കരാർ സാധുവായി കണക്കാക്കുമെന്നും പുതിയ നിയമം വ്യക്തമാക്കുന്നു.
