കുവൈത്ത് അന്താരാഷ്ട്ര വിമാനത്താവളത്തിൽ അടിയന്തര വൈദ്യസഹായം ശക്തിപ്പെടുത്തുന്നതിനായി 20 ഓട്ടോമേറ്റഡ് എക്സ്റ്റേണൽ കാർഡിയാക് ഡിഫിബ്രിലേറ്ററുകൾ സ്ഥാപിച്ചതായി ആരോഗ്യ മന്ത്രാലയം. നിർണായക സാഹചര്യങ്ങളിൽ വേഗത്തിൽ പ്രതികരിക്കാനും അതിജീവന സാധ്യത വർധിപ്പിക്കാനും ലക്ഷ്യമിട്ടാണ് ഈ നീക്കം. ടെർമിനൽ 1, 4, 5 എന്നിവിടങ്ങളിലും വിമാനത്താവളത്തിലെ ആരോഗ്യ കേന്ദ്രത്തിലുമായാണ് എഇഡി ഉപകരണങ്ങൾ സ്ഥാപിച്ചിട്ടുള്ളതെന്ന് മന്ത്രാലയം വക്താവ് ഡോ. അബ്ദുല്ല അൽ-സനാദ് വ്യക്തമാക്കി. ഡിഫിബ്രിലേറ്ററുകൾ ഉടനടി ഉപയോഗിക്കുന്നത് അതിജീവന നിരക്ക് 70% വരെ വർധിപ്പിക്കുമെന്ന് അദ്ദേഹം കൂട്ടിച്ചേർത്തു. അടിയന്തര സാഹചര്യങ്ങളിൽ ഉപയോക്താക്കളെ സുരക്ഷിതമായി നയിക്കുന്നതിന് വ്യക്തമായ ഓഡിയോ, വിഷ്വൽ നിർദ്ദേശങ്ങളോടെയാണ് ഈ ഉപകരണങ്ങൾ സജ്ജീകരിച്ചിരിക്കുന്നതെന്നും അദ്ദേഹം വ്യക്തമാക്കി. ഹൃദയമിടിപ്പ് അപകടകരമാംവിധം ക്രമരഹിതമാകുമ്പോൾ സാധാരണ നിലയിലേക്ക് പുനഃസ്ഥാപിക്കാൻ സഹായിക്കുന്ന ഉപകരണമാണ് കാർഡിയാക് ഡിഫിബ്രിലേറ്റർ. എഇഡികൾ പോർട്ടബിൾ ഡിഫിബ്രിലേറ്ററുകളാണ്. വൈദ്യപരിശീലനം ഇല്ലാത്തവർക്കുപോലും പെട്ടെന്നുള്ള ഹൃദയസ്തംഭനം അനുഭവിക്കുന്ന ഒരാളെ സഹായിക്കാൻ ഇത് എളുപ്പത്തിൽ ഉപയോഗിക്കാം. വിമാനത്താവളത്തിലെ ജീവനക്കാർക്ക് ഈ ഉപകരണങ്ങൾ ഫലപ്രദമായി പ്രവർത്തിപ്പിക്കാനുള്ള കഴിവുകൾ നൽകുന്നതിനായി വിപുലമായ പരിശീലന പരിപാടിയും ആരംഭിച്ചിട്ടുണ്ട്.
