യുഎഇയിൽ രണ്ടിടങ്ങളിലായി നടന്ന ജലഗതാഗത അപകടങ്ങളിൽ 16 പേരെ രക്ഷപ്പെടുത്തിയതായി അധികൃതർ അറിയിച്ചു. മുങ്ങിക്കൊണ്ടിരുന്ന ഉല്ലാസബോട്ടിൽനിന്ന് 13 പേരെയാണ് യുഎഇ നാഷണൽ ഗാർഡ് ഞായറാഴ്ച രക്ഷപ്പെടുത്തിയത്. ഇതിൽ പൗരന്മാരും താമസക്കാരും ഉൾപ്പെടുന്നു. ഉല്ലാസബോട്ടിൽനിന്ന് അപകട മുന്നറിയിപ്പ് ലഭിച്ചതിനെത്തുടർന്നാണ് രക്ഷാപ്രവർത്തനം നടത്തിയത്. നാഷണൽ സെന്റർ ഫോർ സെർച്ച് ആൻഡ് റെസ്ക്യൂ, കോസ്റ്റ് ഗാർഡ് എന്നിവിടങ്ങളിൽ നിന്നുള്ള രക്ഷാസംഘങ്ങൾ സംയുക്തമായാണ് രക്ഷാദൗത്യം പൂർത്തിയാക്കിയത്. ഞായറാഴ്ച രാവിലെ അപകടത്തിൽപെട്ട ചരക്കുകപ്പലിൽനിന്ന് മൂന്ന് ഏഷ്യക്കാരെ അധികൃതർ രക്ഷിച്ചിരുന്നു. നാഷണൽ ഗാർഡ്, കോസ്റ്റ് ഗാർഡ്, സെർച്ച് ആൻഡ് റെസ്ക്യൂ യൂണിറ്റുകൾ എന്നിവ സംയുക്തമായാണ് രക്ഷാപ്രവർത്തനം നടത്തിയത്.
