ഒമാനിൽ ഇപ്രാവശ്യം വേനൽ നേരത്തെ എത്തിയതായി റിപ്പോർട്ട്. ഏറ്റവും കൂടുതൽ താപനില രേഖപ്പെടുത്തിയത് സോഹാറിലാണ്. കഴിഞ്ഞ 24 മണിക്കൂറിനുള്ളിൽ നിരവധി വിലായത്തുകളിൽ 40°C ന് മുകളിൽ താപനില രേഖപ്പെടുത്തിയതായി സിവിൽ ഏവിയേഷൻ അതോറിറ്റി വ്യക്തമാക്കി. തിങ്കളാഴ്ച സൊഹാറിൽ രേഖപ്പെടത്തിയത് 41.9 ഡിഗ്രി സെൽഷ്യസാണ്. അതേസമയം ഒമാനിലെ മിക്ക ഗവർണറേറ്റുകളിലും ഏപ്രിൽ 9 വൈകുന്നേരം മുതൽ ഏപ്രിൽ 10 വൈകുന്നേരം വരെ വടക്കുപടിഞ്ഞാറൻ കാറ്റിന് സാധ്യതയുണ്ടെന്ന് ഒമാൻ കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നൽകി. മുസന്ദം ഗവർണറേറ്റിന്റെ തീരങ്ങളിൽ തിരമാലകൾ വർദ്ധിക്കുന്നതിന് കാറ്റ് കാരണമാകും എന്നും നിർദേശിച്ചിട്ടുണ്ട്. തിരമാലകളുടെ ഉയരം 2.5 മീറ്റർ വരെ എത്തിയേക്കാമെന്നും കാലാവസ്ഥാ വകുപ്പ് മുന്നറിയിപ്പ് നൽകുന്നു. ജനങ്ങൾ ജാഗ്രത പാലിക്കുക.
