ഒമാനിൽ റമദാനിലെ പ്രവൃത്തി സമയം പ്രഖ്യാപിച്ചു. സ്വകാര്യ മേഖലാ മുസ്‌ലിം ജീവനക്കാരുടെ പ്രവൃത്തി സമയം പ്രതിദിനം 6 മണിക്കൂറായിരിക്കും. ആഴ്ചയിൽ 30 മണിക്കൂറിൽ കൂടരുത്. സ്വകാര്യ മേഖലയിലെ സ്ഥാപനങ്ങൾ സാധ്യമാകുന്നിടത്ത് ഫ്‌ളക്‌സിബിൾ പ്രവർത്തന ക്രമീകരണങ്ങളും വിദൂര ജോലിയും സ്വീകരിക്കാൻ മന്ത്രാലയം പ്രോത്സാഹിപ്പിച്ചു.അതേസമയം, ഗവൺമെന്റ് ജീവനക്കാരുടെ ഔദ്യോഗിക പ്രവൃത്തി സമയം രാവിലെ 9 മുതൽ ഉച്ചയ്ക്ക് 2 വരെ തുടർച്ചയായി 5 മണിക്കൂറായിരിക്കും. യൂണിറ്റ് മേധാവികൾക്ക് സൗകര്യമുള്ള പ്രവൃത്തി സമയ സംവിധാനം നടപ്പാക്കാൻ അധികാരമുണ്ട്, ഇത് ജീവനക്കാർക്ക് രാവിലെ 7 മുതൽ ഉച്ചകഴിഞ്ഞ് 3 വരെ അവരുടെ വരവ്, പുറപ്പെടൽ സമയം ക്രമീകരിക്കാൻ സഹായിക്കുന്നു. വിദൂര ജോലി സാധ്യമാകുന്ന ചില തസ്തികകളിൽ, യൂണിറ്റ് മേധാവിയുടെ അംഗീകാരത്തോടെ വിദൂര ജോലി സംവിധാനവും നടപ്പാക്കും. എന്നാൽ കാര്യക്ഷമമായ സേവന വിതരണം ഉറപ്പാക്കാൻ, ഏതൊരു യൂണിറ്റിലെയും 50 ശതമാനത്തിൽ കുറയാത്ത ജീവനക്കാരുടെ സാന്നിധ്യം ജോലിസ്ഥലത്ത് ആവശ്യമാണ്. റമദാനിലെ ആത്മീയവും മതപരവുമായ ആചാരങ്ങൾ ഉൾക്കൊള്ളുന്നതിനൊപ്പം സന്തുലിതമായ തൊഴിൽ അന്തരീക്ഷം നിലനിർത്തുക എന്നതാണ് ഈ ക്രമീകരണം ലക്ഷ്യമിടുന്നത്.
