ദുബായിൽ സൈക്കിൾ, ഇ-സ്‌കൂട്ടർ പാതകളുടെ നിരീക്ഷണത്തിനും പരിപാലനത്തിനുമായി പുതിയ സ്മാർട്ട് അസെസ്‌മെന്റ് സിസ്റ്റം സംവിധാനം. റോഡ്സ് ആൻഡ് ട്രാൻസ്പോർട്ട് അതോറിറ്റിയാണ് ഈ സംവിധാനം അവതരിപ്പിച്ചത്. ഇലക്ട്രിക് സൈക്കിളിൽ ഘടിപ്പിച്ച ക്യാമറ, സെൻസർ എന്നിവ ഉപയോഗിച്ച് ട്രാക്കുകളുടെ അവസ്ഥ വിലയിരുത്തുന്നതാണ് പുതിയ സാങ്കേതികവിദ്യ. നിലവിലെ സൈക്കിൾ, സ്‌കൂട്ടർ യാത്ര തടസ്സപ്പെടുത്താതെ 120 കിലോമീറ്റർ ദൂരം നാലുമണിക്കൂറിനകം പരിശോധിക്കാൻ ഈ സംവിധാനം വഴി കഴിയും. ഇത് പരമ്പരാഗത രീതികളേക്കാൾ 98% കൂടുതൽ കാര്യക്ഷമമാണെന്നും ആർടിഎ വ്യക്തമാക്കി. ദുബായിയുടെ സുസ്ഥിര മൊബിലിറ്റി വിഷൻ 2030 ന്റെ ഭാഗമായി നടത്തുന്ന ഈ സംരംഭം സുസ്ഥിര ഗതാഗതം പ്രോത്സാഹിപ്പിക്കാനും ചെലവ് കുറയ്ക്കാനും സഹായിക്കുമെന്നാണ് ആർടിഎ വിലയിരുത്തുന്നത്.
