വാഹന നമ്പർ പ്ലേറ്റിൽ കൃത്രിമം കാണിച്ച 23 വാഹനങ്ങൾ കഴിഞ്ഞ വർഷം പിടിച്ചെടുത്തതായി ദുബായ് പൊലീസ് വ്യക്തമാക്കി. ഗതാഗത നിയമ ലംഘനങ്ങൾക്കു മറയാക്കാനാണ് ഇവർ കൃത്രിമ നമ്പർ പ്ലേറ്റുകൾ ഉപയോഗിച്ചതെന്നു പൊലീസ് ചൂണ്ടിക്കാട്ടി. ഗതാഗത നിയമ ലംഘനങ്ങൾ കണ്ടെത്താനുള്ള ക്യാമറകൾ, റഡാറുകൾ എന്നിവയെ കബളിപ്പിക്കാനാണ് ഇത്തരക്കാർ വ്യാജ നമ്പർ പ്ലേറ്റുകൾ ഉപയോഗിച്ചത്.
നമ്പർ പ്ലേറ്റിലെ അക്കങ്ങൾ മായിച്ച് കളയുകയോ അവ്യക്തമാക്കുകയോ ചെയ്തവരാണ് അറസ്റ്റിലായത്. നമ്പർ പ്ലേറ്റിൽ കാണിക്കുന്ന ഇത്തരം കൃത്രിമങ്ങൾ നിയമത്തിന് എതിരാണ്. ഗുരുതര ഗതാഗത നിയമ ലംഘനമായാണ് ഇത്തരം കുറ്റകൃത്യങ്ങൾ കണക്കാക്കുക. പിടിക്കപ്പെടുന്നവർക്കെതിരെ ശിക്ഷാ നടപടികൾ സ്വീകരിക്കേണ്ടിവരുമെന്നും പൊലീസ് കൂട്ടിച്ചേർത്തു.
