ഇൻഡിഗോ വിമാന കമ്പനി കോഴിക്കോട് ജിദ്ദ സെക്ടറിൽ കൂടുതൽ സർവീസുകൾ പ്രഖ്യാപിച്ചു. കരിപ്പൂരിൽ നിന്ന് ജിദ്ദയിലേക്ക് ആഴ്ചയിൽ നാല് പുതിയ സർവീസുകളാണ് ഇൻഡിഗോ പ്രഖ്യാപിച്ചത്. ഇൻഡിഗോ കമ്പനിയുടെ ഏഴ് സർവീസുകളാണ് ആഴ്ചയിൽ നിലവിൽ ജിദ്ദയിലേക്ക് സർവീസ് നടത്തുന്നത്. എന്നാൽ ഇത് കൂടാതെ നാല് കൂടി സർവീസുകൾ വർദ്ധിപ്പിച്ച് ആഴ്ചയിൽ 11 സർവീസുകളാണ് നടത്തുക. മാർച്ച് ഒന്നുമുതലാണ് പുതിയ സർവീസുകൾ ആരംഭിക്കുക. ഉച്ചയ്ക്ക് 1:50 നാണ് കോഴിക്കോട് നിന്ന് ജിദ്ദയിലേക്ക് വിമാനം പുറപ്പെടുന്നത്. സൗദി സമയം വൈകിട്ട് 5:30 ന് ജിദ്ദയിൽ നിന്ന് കോഴിക്കോട്ടേക്ക് പുറപ്പെടുന്ന തരത്തിലാണ് ഷെഡ്യൂൾ ചെയ്തിട്ടുള്ളത്. റമദാൻ ഹജ്ജ് സീസണുകളുടെ ഭാഗമായി കൂടുതൽ യാത്രക്കാർ യാത്ര ചെയ്യുന്ന സെക്ടറാണ് കരിപ്പൂർ-ജിദ്ദ. സീസണിനോട് അനുബന്ധിച്ച് വൻതുകയാണ് ഓരോ വിമാന കമ്പനികളും കരിപ്പൂർ-ജിദ്ദ സെക്ടറിൽ ഈടാക്കുന്നത്.
