ബഹ്റൈനിൽ നിന്നുള്ള ഹജ്ജ് -ഉംറ തീർത്ഥാടകർ മെനിഞ്ജൈറ്റിസ് വാക്സിൻ നിർബന്ധമായും എടുത്തിരിക്കണം എന്ന് ആരോഗ്യ മന്ത്രാലയം അറിയിപ്പ് നൽകി. ഒന്നോ അതിൽ കൂടുതലോ പ്രായമുള്ള എല്ലാ തീർത്ഥാടകരും പുറപ്പെടുന്നതിന് പത്ത് ദിവസം മുൻപ്പ് എങ്കിലും മെനിഞ്ജൈറ്റിസ് വാക്സിൻ എടുത്തിരിക്കണമെന്ന് മന്ത്രാലയം വ്യക്തമാക്കി. ഹജ്ജ് -ഉംറ സീസണിനോടനുബന്ധിച്ച് സൗദി അറേബ്യ പുറപ്പെടുവിച്ച പുതിയ ആരോഗ്യ നിർദേശങ്ങളെ തുടർന്നാണ് ഈ അറിയിപ്പ്. രാജ്യത്തെ എല്ലാ പ്രാഥമിക ആരോഗ്യ കേന്ദ്രങ്ങളിലും വാക്സിൻ ലഭ്യമാണ്. രാവിലെ 7 മണി മുതൽ വൈകിട്ട് 6 മണി വരെ ആരോഗ്യ കേന്ദ്രങ്ങൾ സന്ദർശിച്ച് വാക്സിനുകൾ എടുക്കാവുന്നതാണ്. കൂടാതെ, ബന്ധപ്പെട്ട അധികാരികളിൽ നിന്ന് അംഗീകൃത വാക്സിനേഷൻ സർട്ടിഫിക്കറ്റ് കൈപ്പറ്റണമെന്നും അറിയിപ്പിൽ ചൂണ്ടിക്കാട്ടുന്നു. ഈ സർട്ടിഫിക്കറ്റിന് 5 വർഷം വരെ സാധുത ഉണ്ടായിരിക്കും.
