കുവൈത്തിലെ സാദ് അൽ അബ്ദുല്ല പ്രദേശത്ത് ലഹരി മരുന്നായ ക്രിസ്റ്റൽ മെത്തുമായി രണ്ടു പേരെ ജഹ്റ സുരക്ഷ അധികൃതർ പിടികൂടി. ഇവരിൽ ഒരാൾ കുവൈത്തിയും മറ്റൊരാൾ ഗൾഫ് പൗരനുമാണ്. പ്രതികളിൽ നിന്നും അഞ്ച് ബാഗുകളിലായി സൂക്ഷിച്ചിരുന്ന ക്രിസ്റ്റൽ മെത്താണ് കണ്ടെടുത്തത്. ജഹ്റ പട്രോളിങ് ടീമിന്റെ പതിവ് പരിശോധനക്കിടയിലാണ് സാദ് അൽ അബ്ദുല്ല പ്രദേശത്തെ സ്കൂൾ പാർക്കിങ് ഏരിയയിൽ സംശയാസ്പദമായ രീതിയിൽ ഒരു വാഹനം പാർക്കു ചെയ്തിരിക്കുന്നത് അധികൃതരുടെ ശ്രദ്ധയിൽപ്പെട്ടത്. അറസ്റ്റിലായ കുവൈത്തിയുടെ പേരിൽ ഒരു മോഷണക്കേസുള്ളതായും ഗൾഫ് പൗരൻ മറ്റൊരു കേസിൽ ഒരു വർഷത്തോളം ജയിൽ ശിക്ഷ അനുഭവിച്ചതായും കണ്ടെത്തി. അന്വേഷണത്തിനും നിയമനടപടികൾക്കുമായി പ്രതികൾ ഇരുവരെയും ഇവരിൽ നിന്നും കണ്ടെടുത്ത വസ്ത്തുക്കളും ബന്ധപ്പെട്ട വിഭാഗത്തിന് കൈമാറി.
