കുവൈത്തിൽ വിവിധ പ്രദേശങ്ങളില്‍ നിന്നായി ലഹരി മരുന്ന് കേസുകളില്‍ 21 പേരെ അറസ്റ്റ് ചെയ്തതായി റിപ്പോർട്ട്. 17 കേസുകളിലായാണ് ഇത്രയും പേരെ പിടികൂടിയത്. 18 കിലോ ലഹരിമരുന്നാണ് ഇവരിൽ നിന്ന് പിടികൂടിയത്. ക്രിമിനൽ സെക്യൂരിറ്റി സെക്ടർ, ജനറൽ ഡിപ്പാർട്ട്മെന്‍റ് ഫോർ കോംബാറ്റിങ് നാർക്കോട്ടിക്സ് തുടങ്ങിയവർ സംയുക്തമായാണ് പരിശോധന നടത്തിയത്. പിടിയിലായവരില്‍ നിന്ന് 6.213 കിലോഗ്രാം ഹാഷിഷ്, 8.16 കിലോഗ്രാം കഞ്ചാവ്, 3.11 കിലോഗ്രാം ക്രിസ്റ്റൽ മെത്ത്, 153 ഗ്രാം കൊക്കെയ്ൻ, 10 ഗ്രാം ഹെറോയിൻ, 12,042 ലൈറിക്ക കാപ്സ്യൂളുകൾ, 400 കാപ്റ്റഗൺ ഗുളികകൾ, 147 സൈക്കോട്രോപിക് ഗുളികകൾ എന്നിവയാണ് പിടിച്ചെടുത്തത്. ഇതിന് പുറമെ, 9 വെടിയുണ്ടകൾ, ലഹരിമരുന്ന് വിൽപനയിൽ നിന്ന് ലഭിച്ചതായി സംശയിക്കുന്ന 20,825 ദിനാര്‍ പണം തുടങ്ങിയവയും പിടിച്ചെടുത്തിട്ടുണ്ട്. പിടിച്ചെടുത്ത വസ്തുക്കളും പ്രതികളെയും തുടര്‍ നിയമ നടപടികൾക്കായി ബന്ധപ്പെട്ട വകുപ്പുകൾക്ക് കൈമാറി.
