റിയൽ എസ്റ്റേറ്റ് രംഗത്ത് ഓൺലൈൻ വഴി നടക്കുന്ന തട്ടിപ്പുകൾക്കെതിരെ ജാഗ്രത പാലിക്കണമെന്ന് ഖത്തർ ആഭ്യന്തര മന്ത്രാലയത്തിന്റെ മുന്നറിയിപ്പ്. കെട്ടിട വാടകയുമായി ബന്ധപെട്ട് ഓൺലൈനിൽ വഞ്ചനാപരമായ പരസ്യങ്ങളിൽ ആളുകൾ വീഴരുതെന്നും മന്ത്രാലയം പൊതുജങ്ങൾക്ക് മുന്നറിയിപ്പ് നൽകുന്നു. റെസിഡൻഷ്യൽ പ്രോപ്പർട്ടികളും വിനോദ സൗകര്യങ്ങളും കുറഞ്ഞ വിലയിൽ ഓഫർ നൽകുന്ന നിരവധി പരസ്യങ്ങൾ സോഷ്യൽ മീഡിയയിൽ പ്രചരിക്കുന്നുണ്ട്. ഈ ഇടപാടുകളുമായി മുന്നോട്ട് പോകുന്നതിന് മുമ്പ് വിശ്വാസത ഉറപ്പ് വരുത്തേണ്ടതാണ്. വാടകയുമായി ബന്ധപെട്ട് ഓൺലൈനിൽ കാണുന്ന ഓഫറുകളുടെ നിയമസാധ്യത പരിശോധിക്കാനും മന്ത്രാലയം ചൂണ്ടിക്കാട്ടി. സംശയാസ്പദമായി തോന്നിയേക്കാവുന്ന ഓൺലൈൻ പരസ്യങ്ങൾ ശ്രദ്ധയിൽപെട്ടാൽ ആഭ്യന്തര മന്ത്രാലയത്തിൽ റിപ്പോർട്ട് ചെയ്യേണ്ടതാണ്. മെട്രാഷ് ആപ്പ് വഴിയോ cccc@moi.gov.qa എന്ന വിലാസത്തിൽ ഇക്കണോമിക് ആൻ്റ് സൈബർ ക്രൈം കോംബാറ്റിംഗ് ഡിപ്പാർട്ട്‌മെൻ്റിന് ഇമെയിൽ വഴിയോ താമസക്കാർക്ക് ആഭ്യന്തര മന്ത്രാലയത്തിൽ റിപ്പോർട്ട് ചെയ്യാൻ സാധിക്കും.
