യുഎഇയിൽ അവശ്യവസ്തുക്കളുടെ വില വർധനക്ക് ജനുവരി രണ്ട് മുതൽ നിയന്ത്രണം ഏർപ്പെടുത്തി സാമ്പത്തിക മന്ത്രാലയം. അവശ്യസാധനങ്ങൾക്ക് വില വർധന 6 മാസത്തിൽ ഒരിക്കൽ മാത്രമാക്കിയിട്ടുണ്ട്. എന്നാൽ ആറുമാസത്തെ ഇടവേളക്കിടയിൽ വിലവർധിപ്പിക്കാൻ പാടില്ല. അരി, മുട്ട, പാചകയെണ്ണ, പാലുൽപ്പന്നങ്ങൾ, പഞ്ചസാര, കോഴി, പയർവർഗങ്ങൾ, ഗോതമ്പ്, റൊട്ടി തുടങ്ങിയ ഒമ്പത് വസ്തുക്കളുടെ വില അനുമതിയില്ലാതെ വർധിപ്പിക്കരുത്. വിലകൂട്ടാൻ ചില്ലറ വിൽപനക്കാർക്ക് സാമ്പത്തിക മന്ത്രാലയത്തിന്റെ അനുമതി ആവിശ്യമാണ്. പുതിയ ഉത്തരവ് പ്രകാരം അവശ്യ വസ്തുക്കളുടെ വിതരണക്കാർ, ചില്ലറ വ്യാപാരികൾ, ഡിജിറ്റൽ വ്യാപാരികൾ എന്നിവർക്കെല്ലാം ഇത് ബാധകമാണ്. നിയമം പാലിക്കുന്നുണ്ടെന്ന് ഉറപ്പാക്കാൻ അധികൃതർ പ്രത്യേക സംഘത്തെ നിയോഗിച്ചിട്ടുണ്ട്. റീട്ടെയിൽ സ്റ്റോറുകളിൽ വില പ്രദർശിപ്പിക്കുകയും ചെയ്യണം. ശുചീകരണ ഉല്പ്പന്നങ്ങളുടെ ഉൾപ്പെടെ ഏതൊരു ഉല്പ്പന്നത്തിന്റെയും വില വർധിപ്പിക്കണമെങ്കിലും സാമ്പത്തിക മന്ത്രാലയത്തിന്റെ മുൻകൂർ അനുമതി നിർബന്ധമാണെന്ന് മന്ത്രാലയം അണ്ടർസെക്രട്ടറി അബ്ദുല്ല അഹമ്മദ് അൽ സാലിഹ് വ്യക്തമാക്കി. യു.എ.ഇയിലെ എല്ലാ എമിറേറ്റുകളിലും ഇത് ബാധകമായിരിക്കും.
