റോഡ് സുരക്ഷ ഉറപ്പ് വരുത്തുന്നതിന്റെ ഭാഗമായി ട്രാഫിക് മുന്നറിയുപ്പുമായി ഖത്തർ ട്രാഫിക് വിഭാഗം. റോഡിലെ ഇടതുവശത്തെ ലൈനുകൾ ഉപയോഗിക്കുന്നതിൽ കഴിഞ്ഞ മേയ് മുതൽ ഏർപ്പെടുത്തിയ നിയന്ത്രണങ്ങൾ പാലിക്കണമെന്ന് ട്രാഫിക് വിഭാഗം ഡ്രൈവർമാരോട് ആവശ്യപ്പെട്ടു. ഡെലിവറി മോട്ടോർ സൈക്കിൾ , ടാക്സി – ലിമോസിൻ വാഹനങ്ങൾ, 25 ൽ അധികം യാത്രക്കാരുള്ള ബസ്സുകൾ എന്നി വാഹനങ്ങൾ ഇടതുവശത്തെ ലൈൻ ഉപയോഗിക്കാൻ പാടില്ല. മൂന്ന് മുതൽ നാല് വരിപാതകളുള്ള റോഡിൽ ഇടതു ഭാഗത്തുള്ള ഒന്നാമത്തെ വരി ഇത്തരം വാഹനങ്ങൾ ഉപയോഗിക്കരുത്. അഞ്ചോ അതിൽ കൂടുതലോ വരിപാതകളുള്ള റോഡുകളിൽ ഇടതുഭാഗത്തുള്ള ഒന്നും രണ്ടും വരി ഉപയോഗിക്കുന്നതിൽ നിന്നുമാണ് വിലക്ക്. അടുത്ത ആഴ്ചയോടെ സ്‌കൂളുകൾ കൂടി തുറക്കുന്നതോടെ റോഡുകളിൽ തിരക്ക് കൂടും. ഇത് കൂടി മുന്നിൽ കണ്ടാണ് ജനറൽ ഡയറക്ടറേറ്റ് ഓഫ് ട്രാഫിക്ക് ബോധവത്കരണം നടത്തുന്നത്. റോഡുകളിലെ ഗതാഗതം സുഗമമാക്കുക എന്ന ലക്ഷ്യത്തോടെയാണ് ട്രാഫിക് വിഭാഗം നിയന്ത്രണങ്ങൾ നടപ്പിലകാക്കുന്നതെന്ന് അധികൃതർ വ്യക്തമാക്കി
