അബൂദബിയിൽ കാണാതായ മലയാളി യുവാവിനെ ദുബൈയിൽ മരിച്ച നിലയിൽ കണ്ടെത്തി. തിരുവനന്തപുരം പുതിയതുറ സ്വദേശി ഡിക്‌സൻ സെബാസ്റ്റ്യാനാണ് മരിച്ചത്. അബൂദബിയിൽ ഇലക്ട്രോണിക്സ് സ്ഥാപനത്തിലെ ജീവനക്കാരനായിരുന്നു 26 കാരനായ ഡിക്‌സൻ സെബാസ്റ്റ്യൻ. മൂന്നുമാസമായി ഇയാളെ കാണാനില്ലെന്ന അമ്മയുടെയും സഹോദരന്റെയും പരാതികളുടെ അടിസ്ഥാനത്തിൽ അന്വേഷണം പുരോഗമിക്കുന്നതിനിടെയാണ് ഡിക്‌സനെ കഴിഞ്ഞദിവസം മരിച്ച നിലയിൽ കണ്ടെത്തിയത് .തുടർന്ന് ദുബൈ പൊലീസ് സാമൂഹിക പ്രവർത്തകരെ വിവരം അറിയിച്ചു. ദിവസങ്ങൾക്ക് മുമ്പ് ദുബൈയിലെ സബീലിലാണ് മൃതദേഹം കണ്ടെത്തിയത്. തുടർന്ന് മോർച്ചറിയിലേക്ക് മാറ്റിയ മൃതദേഹം സഹപ്രവർത്തകരും ബന്ധുവും എത്തി തിരിച്ചറിഞ്ഞു. മൃതദേഹം നാട്ടിലേക്ക് കൊണ്ടുപോകാനുള്ള നടപടികൾ ആരംഭിച്ചു.
