യു.എ.ഇയിൽ ആരംഭിക്കാനിരിക്കുന്ന പൊതുമാപ്പിൽ , സന്ദർശകവിസ കാലാവധി പിന്നിട്ടവർക്കും പിഴയില്ലാതെ നാട്ടിലേക്ക് മടങ്ങാമെന്ന് അധികൃതർ. സെപ്റ്റംബർ ഒന്ന് മുതലാണ് യു.എ.ഇയിൽ പൊതുമാപ്പ് ആരംഭിക്കുന്നത്. നേരത്തേ റെസിഡൻസി വിസക്കാർക്കാണ് ഈ ആനുകൂല്യം പ്രഖ്യാപിച്ചിരുന്നത്. കാലാവധി പിന്നിട്ട എല്ലാത്തരം വിസക്കാർക്കും പിഴ, എക്‌സിറ്റ് ഫീസ് എന്നിവയില്ലാതെ സെപ്റ്റംബർ ഒന്ന് മുതൽ രണ്ടുമാസം നാട്ടിലേക്ക് മടങ്ങാൻ കഴിയുമെന്ന് യു.എ.ഇ ഐ.സി.പി അധികൃതർ വാർത്താസമ്മേളനത്തിൽ കൂട്ടിച്ചേർത്തു. കൂടാതെ ഇവർക്ക് രേഖകൾ ശരിയാക്കി യു.എ.ഇയിൽ തുടരാനും അവസരമുണ്ടാകും. കാലാവധി പിന്നിട്ട വിസയിൽ കഴിയുന്ന മാതാപിതാക്കളുടെ നവജാത ശിശുക്കൾക്കും ഈ ആനുകൂല്യം ലഭിക്കും. എന്നാൽ സെപ്റ്റംബർ ഒന്നിന് മുമ്പ് കാലാവധി തീർന്നവർക്കേ ആനുകൂല്യം നൽകൂ. ദുബൈയിലെ ആമർ സെന്ററുകൾ, GDRFAയുടെ അവീർ കേന്ദ്രം, അബൂദബിയിൽ ICPയുടെ ഷഹാമ, അൽദഫ്‌റ, സുവൈഹാൻ, അൽമഖ കേന്ദ്രങ്ങൾ, മറ്റ് എമിറേറ്റുകളിലെ ഐ.സി.പി. കേന്ദ്രങ്ങൾ, അംഗീകൃത ടെപ്പിങ് സെന്ററുകൾ എന്നിവയിൽ പൊതുമാപ്പിന് അപേക്ഷ നൽകാം.കൂടാതെ ഐ.സി.പിയുടെ മൊബൈൽ ആപ്പ്, വെബ്‌സൈറ്റ് എന്നിവ വഴിയും പരാതികൾ നൽകാമെന്നും, ഇവർ ബയോമെട്രിക് പരിശോധനക്ക് കേന്ദ്രങ്ങളിൽ നേരിട്ട് ഹാജരായാൽ മതിയെന്നും അധികൃതർ വ്യക്തമാക്കി.
