കാലാവധി കഴിഞ്ഞ കോഴിയിറച്ചി ശേഖരം തീയതി മാറ്റി കൃത്രിമം കാണിച്ച് വിൽക്കാൻ ശ്രമിച്ച മൊത്ത വ്യാപാര സ്ഥാപനത്തിന് സൗദി ഫുഡ് ആൻഡ് ഡ്രഗ് അതോറിറ്റി അഞ്ച് ലക്ഷം റിയാൽ പിഴ ചുമത്തി. സ്ഥാപനത്തിൽ നടത്തിയ പരിശോധനയിൽ ഉപയോഗ കാലാവധിയിൽ തിരുത്തലുകൾ വരുത്തിയ അഞ്ച് ടൺ കോഴിയിറച്ചിയും ഉറവിടമറിയാത്ത കോഴിയിറച്ചിയും, ബീഫ് ശേഖരവും കണ്ടെത്തുകയായിരുന്നു. ചില്ലറ വ്യാപാര സ്ഥാപനങ്ങൾക്ക് മൊത്തമായി വിൽക്കാൻ സൂക്ഷിച്ചതായിരുന്നു ഇവ എന്ന് അധികൃതർ വ്യക്തമാക്കി. ഉപയോഗ കാലാവധിയിൽ തിരുത്തൽ വരുത്താൻ സൂക്ഷിച്ച സ്റ്റിക്കർ ശേഖരവും ഉപകരണങ്ങളും സ്ഥാപനത്തിൽ കണ്ടെത്തിയിരുന്നു. പരിശോധനക്കിടെ കണ്ടെത്തിയ കാലാവധി തീർന്ന കോഴിയിറച്ചിയും ഉറവിടമറിയാത്ത കോഴിയിറച്ചിയും, ബീഫ് ശേഖരവും അധികൃതർ പിടിച്ചെടുത്ത് നശിപ്പിച്ചു. സൗദി ഫുഡ് ആൻഡ് ഡ്രഗ് അതോറിറ്റി മേൽനോട്ട പരിധിയിൽ പ്രവർത്തിക്കുന്ന സ്ഥാപനങ്ങളുടെ ഭാഗത്തുള്ള നിയമ ലംഘനങ്ങളെ കുറിച്ച് 19999 എന്ന നമ്പറിൽ ബന്ധപ്പെട്ട് വിവരം അറിയിക്കണമെന്ന് അതോറിറ്റി പൊതുജനങ്ങളോട് അധികൃതർ ആവശ്യപ്പെട്ടു.
