എയർ ഇന്ത്യ എക്സ്പ്രസ്സ് പുതിയ സർവീസുകൾ ആരംഭിക്കുന്നു. മേയ് ഒന്നു മുതൽ റാസൽഖൈമയിൽ നിന്ന് കണ്ണൂരിലേക്കും മേയ് രണ്ട് മുതൽ ലഖ്‌നൗവിലേക്കും ആണ് പുതിയ സർവീസുകൾ. അതേസമയം അബുദാബിയിൽ നിന്ന് കണ്ണൂർ, കൊച്ചി, മുംബൈ സെക്ടറിലേക്കുള്ള സർവീസ് വർധിപ്പിച്ചിട്ടുമുണ്ട്. റാസൽഖൈമയിൽ നിന്ന് കണ്ണൂരിലേക്ക് ചൊവ്വ, ബുധൻ, വെള്ളി ദിവസങ്ങളിൽ ആഴ്ചയിൽ മൂന്ന് വിമാന സർവീസാണ് ആദ്യം ഉണ്ടാകുക. കണ്ണൂരിൽ നിന്ന് വൈകിട്ട് 6.15ന് പുറപ്പെടുന്ന വിമാനം യുഎഇ സമയം രാത്രി 8.45ന് റാസൽഖൈമയിൽ എത്തി തിരിച്ച് റാസൽഖൈമയിൽനിന്ന് രാത്രി 9.45ന് പുറപ്പെടുന്ന വിമാനം പുലർച്ചെ 3.10ന് കണ്ണൂരിൽ എത്തിച്ചേരും. റാസൽഖൈമയിൽ നിന്ന് ലഖ്‌നൗവിലേക്ക് മേയ് രണ്ട് മുതൽ ചൊവ്വ, വ്യാഴം, ഞായർ ദിവസങ്ങളിൽ സർവീസ് ഉണ്ടാകും. ചൊവ്വ, വ്യാഴം, ഞായർ ദിവസങ്ങളിൽ രാവിലെ 11.55ന് പുറപ്പെട്ട് വൈകിട്ട് 5.15ന് ലഖ്‌നൗവിൽ എത്തിച്ചേരും. അബുദാബിയിൽ നിന്ന് ആഴ്ചയിൽ ആറ് സർവീസുണ്ടായിരുന്ന കൊച്ചിയിലേക്ക് 24 മുതൽ എല്ലാം ദിവസവും സർവീസ് ഉണ്ടാകും. മേയ് മുതൽ അബുദാബിയിൽ നിന്ന് കണ്ണൂരിലേക്ക് നാല് അധിക സർവീസ് ആരംഭിക്കും. പുതുക്കിയ ഷെഡ്യൂൾ പ്രകാരം എയർ ഇന്ത്യ എക്സ്പ്രസിന്റെ അബുദാബി – ഇന്ത്യ സെക്ടറിലെ സർവീസുകൾ ആഴ്ചയിൽ 31ൽ നിന്ന് 43 ആയി കൂടും.
