റമദാനിൽ ഭക്ഷ്യ ഉൽപന്നങ്ങൾക്ക് ഇളവ് പ്രഖ്യാപിച്ച് ഖത്തർ വാണിജ്യ, വ്യവസായ മന്ത്രാലയം. 900ത്തോളം ഉൽപനങ്ങൾക്കാണ് റമദാനിൽ വിലക്കുറവ് മന്ത്രാലയം പ്രഖ്യാപിച്ചത്. നിത്യോപയോഗ വസ്തുക്കൾ ആയ, പാൽ, തൈര്, പാലുൽപ്പന്നങ്ങൾ, ടിഷ്യൂ പേപ്പർ, ക്ലീനിംഗ് ഉൽപ്പന്നങ്ങൾ, പാചക എണ്ണകൾ, നെയ്യ്, ചീസ്, ശീതീകരിച്ച പച്ചക്കറികൾ, പരിപ്പ്, കുടിവെള്ളം, ജ്യൂസുകൾ, തേൻ, റൊട്ടി, ടിൻ ഭക്ഷണങ്ങൾ, പാസ്ത എന്നിവക്കാണ് വിലക്കുറവ് പ്രഖ്യാപിച്ചതെന്ന് മന്ത്രാലയം വ്യക്തമാക്കി. രാജ്യത്തെ വിവിധ ഹൈപ്പർമാർക്കറ്റുകളുമായി സഹകരിച്ചാണ് മന്ത്രാലയം വിലയിൽ ഇളവ് പ്രഖ്യാപിച്ചത്. തിങ്കളാഴ്ച ആരംഭിച്ച റമദാൻ ഡിസ്കൗണ്ട് പെരുന്നാൾ വരെ തുടരുമെന്നും മന്ത്രാലയം വ്യക്തമാക്കി. സ്വദേശികൾക്കും താമസക്കാർക്കും നോമ്പുകാലത്ത് കുറഞ്ഞ വിലക്ക് സാധന സമഗ്രികൾ ലഭ്യമാക്കുന്നതിന്റെ ഭാഗമായാണ് മന്ത്രാലയം വിപണിയിൽ ഇടപെടൽ വരുത്തിയത്. ലുലു ഹൈപ്പർമാർക്കറ്റ്, ഗ്രാൻഡ് മാൾ ഹൈപ്പർമാർക്കറ്റ്സ്, സഫാരി ഹൈപ്പർമാർക്കറ്റ്, അൽ മീര, കാരിഫോർ, ഫാമിലി ഫുഡ്സെന്റർ തുടങ്ങിയ ഹൈപ്പർമാർക്കറ്റുകളിലെല്ലാം വിലയിൽ ഇളവ് ലഭിക്കുമെന്നും വാണിജ്യ, വ്യവസായ മന്ത്രാലയം വ്യക്തമാക്കി.
