റിയാദില്‍ സ്വകാര്യ ആശുപത്രികളില്‍ ആദ്യ പരിശോധനക്കു ശേഷം രണ്ടാഴ്ചക്കുള്ളില്‍ വീണ്ടും ഡോക്ടറെ കാണാന്‍ കണ്‍സള്‍ട്ടേഷന്‍ ഫീസ് നല്‍കേണ്ടതില്ലെന്ന് റിയാദ് ആരോഗ്യ വകുപ്പ്. ആരോഗ്യ മന്ത്രാലയം പ്രഖ്യാപിക്കുന്ന തീരുമാനങ്ങളും നിര്‍ദേശങ്ങളും പാലിക്കാന്‍ സ്വകാര്യ ആരോഗ്യ സ്ഥാപനങ്ങള്‍ ബാധ്യസ്ഥമാണെന്ന് സ്വകാര്യ ആരോഗ്യ സ്ഥാപന നിയമത്തില്‍ ഏഴാം ഖണ്ഡികയിലെ മൂന്നാം വകുപ്പ് അനുശാസിക്കുന്നുണ്ട്. ആദ്യ പരിശോധനാ തീയതി മുതല്‍ പതിനാലു ദിവസത്തിനുള്ളില്‍ സൗജന്യമായി വീണ്ടും ഡോക്ടറെ കാണാന്‍ രോഗിക്ക് അവകാശമുണ്ടെന്ന് സ്വകാര്യ ആശുപത്രികളില്‍ രോഗികളുടെ അവകാശങ്ങളും കടമകളുമായും ബന്ധപ്പെട്ട പ്രമാണം വ്യക്തമാക്കുന്നതായും റിയാദ് ആരോഗ്യ വകുപ്പ് പറഞ്ഞു.
