അടുത്ത വർഷത്തോടെ 25 ശതമാനം മുവാസലാത്ത് ബസുകളും ഇലക്ട്രിക്കലാക്കുന്നതിനുള്ള നടപടികൾ ഊർജിതമാക്കി ഖത്തർ. പൊതുഗതാഗത സംവിധാനങ്ങള്‍ വൈദ്യുതീകരിക്കുന്നത്തിനുള്ള നടപടികള്‍ നടന്നുകൊണ്ടിരിക്കുകയാണ്. ലോകകപ്പിന് മുമ്പായി 1100 ഇലക്ട്രിക് ബസുകള്‍ നിരത്തിലിറങ്ങും. കാണികളെ സ്റ്റേഡിയങ്ങളിലേക്കെത്തിക്കുന്നത് ഇ ബസുകളായിരിക്കും. രാജ്യത്തെ വിവിധ ഭാഗങ്ങളിലായി 2700 ബസ് സ്റ്റോപ്പുകളും ഉടന്‍ സജ്ജമാകും.
സമ്പൂർണ വൈദ്യുതീകരണത്തിന്‍റെ ഭാഗമായി പൊതു യാത്രാ ബസ്സുകള്‍, സര്‍ക്കാര്‍ സ്‌കൂള്‍ ബസ്സുകള്‍, മെട്രോ ഫീഡര്‍ ബസ്സുകള്‍ എന്നിവ ക്രമേണ വൈദ്യുതി വാഹനങ്ങളാക്കാനാണ് പദ്ധതി. പൊതുഗതാഗതം പൂർണമായും വൈദ്യുതിയിലേക്ക് നീങ്ങുന്നത് വഴി 2030ഓടെ രാജ്യത്തെ കാർബൺ പുറന്തള്ളൽ ഗണ്യമായി കുറക്കാൻ കഴിയുമെന്നാണ് ഭരണകൂടത്തിന്‍റെ പ്രതീക്ഷ. കാര്‍ബണ്‍ ബഹിര്‍ഗമനം കുറച്ച് ഗതാഗത സംവിധാനങ്ങള്‍ പരമാവധി പരിസ്ഥിതി സൗഹൃദമാക്കുകയെന്ന ലക്ഷ്യത്തിലേക്ക് രാജ്യം അതിവേഗം മുന്നേറിക്കൊണ്ടിരിക്കുകയാണെന്ന് ഗവണ്‍മെന്‍റ് കമ്മ്യൂണിക്കേഷന്‍സ് ഓഫീസ് അറിയിച്ചു.
