ഇന്ത്യ കുവൈറ്റ് നയതന്ത്ര ബന്ധം ആറ് പതിറ്റാണ്ടുകൾ പിന്നിടുന്ന വേളയിൽ വാർഷികാഘോഷത്തിന്‍റെ ഭാഗമായി ഒരു വർഷം നീളുന്ന കലാ സാംസ്കാരിക പരിപാടികളാണ് പ്രഖ്യാപിച്ചിരിക്കുന്നത്. ഇന്ത്യൻ അംബാസിഡർ സിബി ജോർജും നാഷനൽ കൗൺസിൽ ഫോർ കൾച്ചർ, ആർട്സ് ആൻഡ് ലെറ്റേഴ്സ് (എൻസിസിഎഎൽ) സെക്രട്ടറി ജനറൽ കാമിൽ അബ്ദുൽ ജലീലും ചേർന്നാണ് ആഘോഷപരിപാടികൾ പ്രഖ്യാപിച്ചത്.
ശൈഖ് മുബാറക് മ്യൂസിയം കിയോസ്കിൽ ഡിസംബർ രണ്ടിന് നടക്കുന്ന ഇന്ത്യ ദിനത്തിൽ സംയുക്ത സംഗീത പരിപാടിയും ഡിസംബർ അഞ്ച് മുതൽ ഒമ്പത് വരെ ഇന്ത്യൻ സാംസ്കാരിക വാരാചാരണവും നടത്തും. ഇതോടനുബന്ധിച്ച് സെമിനാറുകൾ ഇന്ത്യൻ സിനിമകളുടെ പ്രദർശനം, സാംസ്കാരിക പരിപാടികൾ എന്നിവയും സംഘടിപ്പിക്കും. തുടർന്നുള്ള ദിനങ്ങളിൽ ഇരുരാജ്യങ്ങളുടെയും സമുദ്ര വ്യാപാര ചരിത്രവുമായി ബന്ധപ്പെട്ട സംയുക്ത പരിപാടികൾ, ഇന്ത്യൻ വസ്ത്രങ്ങളുടെ പ്രദർശനം, മോഡേൺ ആർട്ട് മ്യൂസിയത്തിൽ കലാ പ്രദർശനം, പ്രോപ്പർട്ടി എക്സിബിഷൻ, സിംപോസിയം, കുവൈത്ത് നാഷനൽ മ്യൂസിയത്തിൽ നാണയ, ആഭരണ പ്രദർശനം എന്നിവയും ഷെഡ്യൂൾ ചെയ്തിട്ടുണ്ട്.
