യുഎഇയിലെ എയർലൈൻ മേഖലയിൽ ഒഴിവുകൾ പ്രഖ്യാപിച്ച് വിമാന കമ്പനികൾ. ക്രൂ അംഗങ്ങള്‍, എയർപോർട്ട് ജീവനക്കാര്‍ എന്നി തസ്തികകളിലേക്ക് 3600 ഒഴിവുകളാണ് എമിറേറ്റ്സ് ഗ്രൂപ്പ് കഴിഞ്ഞമാസം പ്രഖ്യാപിച്ചത്. ദുബൈയിലെ ഹബ്ബിലേക്കായിരുന്നു നിയമനങ്ങൾ മുഴുവൻ. തൊട്ടുപിന്നാലെ ഇത്തിഹാദ് എയർലൈൻസും ഒഴിവുകൾ പ്രഖ്യാപിച്ചു.
ആയിരം ഒഴിവുകളിലേക്ക് യു എ ഇ, ഈജിപ്ത്, ലബനാൻ, റഷ്യ, സ്പെയിൻ, ഇറ്റലി, നെതർലന്റ് എന്നിവിടങ്ങളിൽ റിക്രൂട്ട്മെന്റ് ഡ്രൈവ് നടത്തുമെന്നാണ് ഇത്തിഹാദ് അറിയിച്ചത്. 500 ലധികം ഒഴിവുകളിലേക്കാണ് നിയമനമെന്നും അയ്യായിരം ദിർഹം വരെ ശമ്പളം പ്രതീക്ഷിക്കാമെന്നും റിക്രൂട്ടിങ് കമ്പനിയായ അഡെക്കോ അറിയിച്ചിട്ടുണ്ട്. യുഎഇയിലെ ഒരു വിമാനകമ്പനിക്കായി ഈ മാസം 11 ന് ബർദുബൈ ഹോളിഡേ ഇൻ ഹോട്ടലിൽ രാവിലെ ഒമ്പത് മുതൽ വൈകുന്നേരം അഞ്ച് വരെ വാക്ക് ഇൻ ഇന്റർവ്യൂ നടത്തുമെന്നും ഏജൻസി അറിയിച്ചു.
