ആഭ്യന്തര വിമാന സര്‍വീസ്, ട്രെയിന്‍, ബസ് സര്‍വീസ് തുടങ്ങിയവ ഉപയോഗിക്കാന്‍ രണ്ട് ഡോസ് വാക്‌സിനും സ്വീകരിച്ചിരിക്കണമെന്ന് സൗദി. ഒക്ടോബര്‍ പത്ത് മുതല്‍ ആഭ്യന്തര വിമാന സര്‍വീസുകൾ ഉപയോഗിക്കാൻ രണ്ട് ഡോസ് വാക്‌സിന്‍ നിര്‍ബന്ധമെന്ന് സിവില്‍ ഏവിയേഷന്‍ അതോറിറ്റി വ്യക്തമാക്കി. ട്രെയിന്‍ സര്‍വീസുകളില്‍ കയറാനും നിബന്ധന മാറ്റിയതായി റെയില്‍വേ അറിയിച്ചു. സൗദി സിവില്‍ ഏവിയേഷന്‍ അതോറിറ്റി ആഭ്യന്തര വിമാന സര്‍വീസ് ഉപയോഗിക്കുന്ന കാര്യം സൂചിപ്പിച്ച് സര്‍ക്കുലര്‍ ഇറക്കിയിട്ടുണ്ട്.
ഗാക്ക സര്‍ക്കുലര്‍ പ്രകാരം അന്താരാഷ്ട്ര വിമാനങ്ങളില്‍ വരുന്നവരുടെ കാര്യത്തില്‍ ഇതുവരെ മാറ്റമൊന്നുമില്ല. ഇവർ വാക്‌സിന്‍ പൂര്‍ത്തിയായില്ലെങ്കില്‍ സൗദിയിലെത്തിയ ശേഷം ക്വാറന്റൈന്‍ പൂര്‍ത്തിയാക്കിയാല്‍ മതി. ഈ മാസം പത്തിനകം എല്ലാവരും വാക്‌സിനേഷന്‍ പൂര്‍ത്തിയാക്കേണ്ടി വരും. തവക്കല്‍നാ ആപ്പിലും മാറ്റം വരുന്നുണ്ട്. രണ്ട് ഡോസും സ്വീകരിച്ചവരുടെ തവക്കല്‍നാ ആപില്‍ മാത്രമേ ഇമ്യൂണ്‍ എന്ന പച്ച സ്റ്റാറ്റസ് കാണിക്കൂ. നിലവില്‍ ഒരു ഡോസ് സ്വീകരിച്ചവര്‍ക്കും ഇമ്യൂണ്‍ ബൈ ഫസ്റ്റ് ഡോസ് എന്ന സ്റ്റാറ്റസ് ഉണ്ട്. ഇനി അതുണ്ടാകില്ല.
