ഇന്ത്യൻ പ്രവാസികൾ യുഎയിൽ ശ്രദ്ധിക്കേണ്ട മാർഗനിർദേശങ്ങൾ ദുബായ് ഇന്ത്യൻ കോൺസുലേറ്റ് പുറത്തിറക്കി. എന്തൊക്കെ ചെയ്യാം എന്തൊക്കെ ചെയ്യാൻ പാടില്ല തുടങ്ങിയ കാര്യങ്ങളാണ് ഇതിൽ പരാമർശിക്കുന്നത്. 17 ഇന നിർദേശങ്ങൾ അടങ്ങിയ മാർഗരേഖ പുറത്തിറക്കിയത് പ്രവാസി ഭാരതീയ സഹായതാ കേന്ദ്രമാണ്.
സാധാരണ പ്രവാസികളെ സഹായിക്കുന്നതിനുള്ള കേന്ദ്ര സർക്കാരിന്റെ ക്ഷേമ സംരംഭമാണ് പ്രവാസി ഭാരതീയ സഹായതാ കേന്ദ്രം. പ്രവാസികൾ അനുഭവിക്കുന്ന വിവിധ പ്രശ്നങ്ങൾ മുൻനിർത്തിയും യുഎഇയിലെ ജീവിതം മികച്ചതാക്കി മാറ്റാൻ ലക്ഷ്യമിട്ടുമാണ് മാർഗരേഖ തയ്യാറാക്കിയിരിക്കുന്നതെന്ന് കോൺസുലേറ്റ് അറിയിച്ചു.
അടിയന്തിര ആവശ്യത്തിനുള്ള ടെലഫോൺ നമ്പറുകൾ എല്ലാവരും സൂക്ഷിക്കണം
തൊഴിലിടങ്ങളിൽ അനുഭവിക്കുന്ന മാനസിക ശാരീരിക പീഡനങ്ങൾ കൃത്യസമയത്ത് ബന്ധപ്പെട്ടവരെ അറിയിക്കണം
ജോലിയുമായി ബന്ധപ്പെട്ട പരാതികൾ തൊഴിൽ പെർമിറ്റ് ക്യാൻസൽ ചെയ്യുന്നതിനുമുമ്പ് മന്ത്രാലയത്തെ അറിയിച്ചിരിക്കണം
നിയമപരമായ സംവിധാനങ്ങൾ ഉപയോഗിച്ച് മാത്രം പണമിടപാടുകൾ നടത്തുക
ജോലിയുടെ തുടക്കം മുതൽ പെൻഷൻ പദ്ധതിയിൽ ഭാഗമാക്കണം
തട്ടിപ്പുകൾക്കെതിരെ ജാഗ്രത പുലർത്തുക
സമൂഹ മാധ്യമങ്ങളിലെ ഇടപെടലുകൾ മാന്യവും നിയമാനുസൃതവും ആയിരിക്കണം
മറ്റുള്ളവരുടെ വികാരങ്ങളെ വൃണപ്പെടുത്തുന്ന രീതിയിൽ മതപരമായ കാര്യങ്ങൾ സമൂഹമാധ്യമങ്ങളിൽ പോസ്റ്റ് ചെയ്യരുത്
നിയന്ത്രണമുള്ള സ്ഥലങ്ങളിൽ ഫോട്ടോ എടുക്കരുത്
വ്യക്തികളുടെ ഫോട്ടോ അനുവാദമില്ലാതെ പോസ്റ്റ് ചെയ്യരുത് തുടങ്ങിയ കാര്യങ്ങൾ മാർഗരേഖയിൽ വ്യക്തമാണ്.
